Astanadaǵy  páterlerdiń kóbi ortalyqtandyrylǵan jylý júıesine qosylǵan. Sonyń ózinde keıbir úılerdegi aýa temperatýrasy  basqa páterlermen salystyrǵanda tómen. Munyń sebebin jáne joǵalǵan jylýdy qalaı qaıtarýǵa bolatyny týraly  «Astanaenergoservıs» AQ baspasóz qyzmeti aıtyp berdi, dep jazady Qamshy.kz aqparat agenttigi.

«Páterdiń salqyn bolýyna birneshe faktor áser etýi múmkin. Onyń ishindegi eń jıi kezdesetini jylý ızolásıasynyń nashar bolýy. Mamandar eń aldymen esik-terezelerdi tekserý jóninde keńes beredi. Úıdegi jylýdyń 30-40 paıyzy osy jerden joǵalatynyn esten shyǵarmaýymyz qajet. Esik-terezesi sapaly úıde jylý 1,5 ese saqtalady», - delingen baspasóz habarlamasynda.

«Astanaenergoservıs» AQ-nyń habarlaýynsha, kópqabatty paneldi úılerdiń turǵyndary qabyrǵa jaǵynan qıyndyq kórýi múmkin. Ásirese jylytý batareıasy men qabyrǵa arasyndaǵy keńistikke kóńil bólý kerek. Osy aralyqqa bir qabat jylý shashatyn  materıal ornatý kerek.

Úıdiń salqyn bolýyna sebep bolatyn taǵy bir faktor – jylytqyshtyń jetkilikti dárejede qyzymaýy. Bul jylytý qurylǵysynyń ishine aýa nemese qurylys qoqysynyń turyp qalýynan bolady. Keıde zaýyttan shyqqan aqaý áser etýi de múmkin.

«Osyndaı faktorlardy elemeıtin turǵyndar máseleni  jylý jetkizýshilerden izdeıdi. Keıbir páterde +30, onyń kórshisinde + 15. Al  jylý shyǵyny barlyq úıge birdeı bólinedi», - deıdi kompanıa mamandary.

Jylý berýshilerdiń aıtýynsha,  kóp qabatty úıdiń turǵyndary páterleriniń tym ystyq ekendigin de aıta bermeıdi. Bir páterdiń ystyq bolýy  úıdiń jylynýyndaǵy tepe-teńdiktiń buzylýynyń belgileri. Máseleniń aldyn alsa, jylý shyǵyny barlyq turǵyndarda kemıtin edi.

Ortasha eseppen astanalyq turǵyn úshin bir sharshy metrdi jylytý quny aıyna 70 teńge bolsa, 60 sharshy metr jumsalatyn shyǵyn kólemi 4200 teńge.