QR Prezıdenti Ákimshiliginiń eks-jetekshisi Aslan Mýsın uly Asylbek Mýsınniń ólimine qatysty málimdeme jasady, dep jazady Qamshy.kz aqparat agenttigi serke.org málimetine súıenip.
Qazaqstandaǵy rasıonal monoteızmniń negizin salýshy fılosof Asylbek Mýsınniń qaıtys bolǵanyna qyryq kúnnen asty. Marqumdy eske alý úshin onyń dostary men týystary fılosoftyń dúnıetanym jónindegi kózqarasyn baıandaıtyn fılm jasady.
Fılmniń kirispe bóliminde Asylbektiń ákesi, memleket qaıratkeri Aslan Mýsın súıikti úlken ulynyń mezgilsiz qazaǵa ushyraǵan tusynda qaıǵysyna ortaqtasyp, moraldyq qoldaý bildirgen barsha jurtqa rahmet aıtty. Onyń aıtýynsha, Asylbek Mýsın dúnıeni tanyp bilýge, adam bolmysy men adamzat tanymy jónindegi fılosofıalyq oıǵa aýqymdy úles qosyp, óziniń artynda mol mura qaldyrdy. Golandıada Asylbek Mýsınniń basshylyǵymen adamzat tarıhynda jınaqtalǵan gýmanıtarlyq, fılosofıalyq, ǵylymı oı 114 tomǵa toptastyryldy, ony zertteıtin jáne júıeleıtin «Monoteızm ınstıtýty» quryldy. «Monoteızm ınstıtýtyna» birikken álem ǵalymdary Quran, İnjil, Taýrat jáne taǵy basqa da kıeli kitaptardy oqyp túsinetin ámbebap sózdik jasaýdy jalǵastyryp jatyr. Asylbek Mýsın jáne onymen pikirles dostary dúnıeni tanyp bilýdiń rasıonal monoteızm fılosofıasynyń metodologıasyna negizdelgen júzdegen saǵattyq sapaly aýdıo-vıdeo materıaldar daıyndap ketti.
Asylbek Mýsın 1979 jyly týǵan. Ekonomıka salasy boıynsha joǵarǵy bilim alǵan ol jastaıynan din máselesin jan-jaqty zerttegen fılosof ǵalym. Onyń esimi Qazaqtanda «İzgi amal» pikirlester klýbymen, bylaıǵy jurt «quranshylar» dep ataıtyn ıslamı aǵymmen tyǵyz baılanysty. Asylbek Mýsın osy aǵymnyń kóshbasshy ıdeology sanalady. Ol dinı-tanymdyq taqyryptardy qamtıtyn ruh.kz, anti-idol.kz, nurmura.kz ınternet saıttaryna basshylyq jasady.
Qazaqstandyq rasıonal monoteıserdiń («quranshylardyń») pikiri boıynsha, Qudaıdyń adamǵa jasaǵan eń úlken syıy – Aqyl. Iaǵnı, adam Qudaıdyń syıyn - Aqyldy paıdalanýy mindetti, Aqıqatty Aqyl arqyly tanýy qajet. Buǵan qosymsha retinde Qudaı adamdar jolbasshy etsin dep Kitap jiberdi. Quran – bári qamtylǵan, tolyq ári anyq baıandalǵan kitap. Sondyqtan, Qurandy túsindiretin, Aqıqatty tanýǵa kómektesetin qosymsha kitaptardyń, mazhabtardyń, tarıqattardyń, áýlıelerdiń, hadısterdiń jáne t.b. qajeti joq.
Aqıqatty izdeýdiń eń úzdik joly – ǵylym men fılosofıa. Ár nársege syn kózben qarap daǵdylanbaı naǵyz bilimge jetý múmkin emes. Aqıqat týrasyndaǵy derek synsyz, dálelsiz qabyldanar bolsa, onyń qundylyǵy men paıdasy kúmándi.
Árbir esi durys adamnyń Qurandy óz betinshe oqyp-bilýge, sol arqyly Aqıqatty tanýǵa shamasy jetedi. Óıtkeni, adamda Aqyl bar. Aqıqatty tanyp-bilýde Aqyl – qural (ınstrýment), Quran – nusqaýlyq (ınstrýksıa). Bul metodologıa boıynsha, barlyq nárseni Aqylǵa salyp, zertteý kerek, dálel tabylyp jatsa ǵana, ol Aqıqat retinde qabyldanýy qajet.
