Maqtaral aýdanynyń qala, kent, aýyldyq okrýgterinde aýdan ákimi Ǵ. Ismaılovtyń 2017 jylda jasalǵan jumystary boıynsha qorytyndy eseptik kezdesýi ótip jatyr. Turǵyndar jasalǵan jumystarǵa qanaǵattanarlyq degen baǵa berip, aýdanda qurylys nysandarynyń jumysy qarqyndaǵanyn jyly qabyldady.
Maqtaly ólkede turǵyn úı qurylysy úshin 2017 jyly 344 jer telimi bólinip, qurylys jumystary júrgizilgen. Sondaı-aq, jalpy kólemi 24,9 myń sharshy metrdi quraıtyn 176 turǵyn úı paıdalanýǵa qabyldanypty. Myrzakent, Atakent, Asyqata kentteriniń bazar aımaǵyndaǵy kólik keptelisin retke keltirý, abattandyrý, kógaldandyrý, jaıaý aıaqjol qurylystaryny jumysy júrgizilip, paıdalanýǵa berilgen.
Ústimizdegi jyly jalpy quny 8,9 mlrd. teńgeni quraıtyn 4700 oqýshyǵa arnalǵan 12 mekteptiń qurylysy júrgizilip, onyń 3-eýi oqý jyly qarsańynda el ıgiligine berilse, qalǵan 8 mektep aǵymdaǵy jyly, 1 mektep kelesi jyly paıdalanýǵa tapsyrylady dep kútilýde. Sondaı-aq, ótken jyly 2 dárigerlik ambýlatorıa, 4 feldsherlik akkýsherlik pýnkt, Qaraqaı, Maqtaly aýyldyq okrýg ákimi apparatynyń ákimshilik ǵımarattarynyń da resmı ashylý saltanaty bolyp ótken bolatyn.
Aýdan basshysy Ǵ.Ismaılov esepti kezdesýinde: "2007 jyly aýdandaǵy mektepterdiń 50-i ǵana tıpti ǵımarattarda ornalasqan bolsa, qazirgi tańda olardyń sany 99-ǵa jetti. Dál osylaı joǵary qarqynmen qurylys jumystaryn júrgizý arqyly aldaǵy 3-4 jylda bilim berý nysandaryn tolyqtaı tıpti mektepterge aınaldyramyz" - dedi.
Jetisaı qalasynyń ońtústik bóliginde Yntymaq eldi mekenine deıingi aralyqtaǵy 80 gektar jer telimine 60 páterli 2 turǵyn úı, 20 páterli 4 turǵyn úı, 40 páterli 6 turǵyn úıge jer bólinip, JSQ daıyndaldy. Birińǵaı 5 qabatty turǵyn úılerdiń qurylysy aǵymdaǵy jyly bastalady.
Byltyr jalpy quny 229,2 mln. teńgeni quraıtyn 62 nysannyń jobalaý-smetalyq qujatamalary ázirlenip, 28-ne memlekettik saraptamanyń oń qorytyndysy alynǵan jáne onyń 34-i bıylǵa ótken. Onyń ishinde joǵaryda atalǵan kóp qabatty turǵyn úılerden bólek, 200 oryndyq 10 mektep, 300 oryndyq 11 mektep, 1 páterli 24 turǵyn úı, 3 sport nysany, jumyspen qamtý bólimi men múgedekter úıiniń ǵımaraty nysandary bar.
