Almaty oblysynda 602 azamat «Chernobyl apatyn zalalsyzdandyrýǵa qatysqany úshin» tósbelgisimen marapattaldy, dep habarlaıdy Qamshy.kz aqparat agenttigi.
Marapatty tapsyrý rásimi Taldyqorǵan qalasynda Chernobyl apaty qurbandaryn eske alý jáne Almaty oblystyq «Chernobyl ardagerleri men múgedekteri» qoǵamdyq birlestiginiń 25 jyldyǵyna arnalǵan «Erlikke taǵzym» atty saltanatty jıynda barysynda ótti.
Oblys ákiminiń orynbasary Lazzat Turlashov Chernobyl apatyna baılanysty statısıkalyq derekterdi atap ótti. Onyń aıtýynsha, atom elektr stansasyndaǵy apat zardaptaryn joıýǵa 32 myńnan astam qazaqstandyq qatysqan. Sonyń ishinde Almaty oblysynyń 2 myńdaı turǵyny bar.
«Prezıdentimiz Nursultan Ábishuly Nazarbaevtyń basshylyǵymen elimiz táýelsizdikke qol jetkizgen tusta Memleket basshysy eń aldymen ıadrolyq qarýdan bas tartyp, Semeı polıgonyn jabý týraly tarıhı sheshim qabyldady. Óıtkeni Chernobyl apaty búkil álemge atom energıasynyń baqylaýdan shyǵyp ketse qandaı kúıge ushyratynyn kórsetip berdi. Sonymen qatar bul qaıǵyly oqıǵa óz ómirlerin aıamastan apattyń zardabyn joıýǵa atsalysqan adamdardyń erik-jigeri men batyrlyq úlgisin de tanyta aldy. Búgin biz chernobyldyq erlerdi eske alýǵa jınalyp otyrmyz. Árqaısylaryńyzdyń sol kezeńdegi is-áreketterińiz - búgingi urpaq úshin erliktiń úlgisi», - dedi L. Turlashov.
