Semeıde medısınalyq jedel járdem aýrýhanasynyń bazasynda jańa polıtravma jáne ortopedıa ortalyǵy ashylmaq, dep jazady Qamshy.kz aqparat agenttigi.

2018 jyly Semeıde jańa polıtravma jáne ortopedıa, gematologıalyq ortalyqtary ashylady. Sonymen qatar, «Rýhanı Janǵyrý» baǵdarlamasy aıasynda SHQO dástúrli qazaq medısına ortalyǵy qurylady. Biregeı ortalyqtar, kadrlardy qaıta daıarlaý jáne zamanaýı jabdyqtarmen qamtýǵa baǵyttalǵan is-sharalar legi aımaqtaǵy medısına salasyna tyń serpin bereri sózsiz.  

SHQO Azıa keńestiginde balamasy joq biregeı, úzdik tehnologıalar qatary shoǵyrlanǵan gematologıalyq ortalyqtyń jobalaý jumysy aıaqtalý ústinde. Aımaq basshysy Danıal Ahmetovtyń bastamasymen aldaǵy tańda Semeıde de alǵashqy polıtravma jáne ortopedıa ortalyǵy ashylmaq. 

– Semeıde medısınalyq jedel járdem aýrýhanasynyń negizinde ashylatyn jańa polıtravma jáne ortopedıa ortalyǵy respýblıkalyq travmatologıa jáne ortopedıa ǵylymı-zertteý ortalyǵynyń jetekshi mamandarymen birge ishki protezdeý jáne kúrdeli jaraqattardy emdeý úshin eń ozyq tehnologıalardy engizýge múmkindik beredi, - dedi oblys densaýlyq saqtaý basqarmasynyń basshysy Marat Shoranov. - Bul jerde Semeıdegi jedel medısınalyq járdem aýrýhanasynyń róli óte mańyzdy, sebebi bul aýrýhana SHQO 9 aýdanyna qyzmet etedi.

Medısınalyq jedel járdem aýrýhanasynda qazirgi tańda mýltımedıalyq quraldarmen jabdyqtalǵan ota jasaý bólimi, ınsýlt ortalyǵy, ondaǵy naýqastaryn erte qalpyna keltirýge zaly qyzmet etedi. Budan bólek, fızıoterapıa bólimi, jańa quraldarmen jabdyqtalǵan eki birdeı gımnastıka bólmesi de bar. Munda sondaı-aq, halyqaralyq standarttarǵa sáıkes naýqastardyń óz syrqattaryn basqarýǵa úıretetin túrli mektepter jumys jasaıdy. Al aýrýhana mamandary jyl saıyn shet elde biliktilikterin kóterip, arnaıy kýrstardan ótedi. Bul rette aımaq basshysy arnaıy oblystyq baǵdarlamanyń arqasynda óńirdiń densaýlyq saqtaý salasy tolyq jetildirilip, jańarýdan ótetin aıtady.

– Densaýlyq saqtaý salasyn damytýdyń negizgi elementteri - medısına qyzmetkerlerin únemi daıyndaý, álemdik medısınalyq standarttardy qatań saqtaý bolyp tabylady. Kelesi jyly oblystyń barlyq medısınalyq mekemeleri orta deńgeıdegi álemdik jabdyqtarmen qamtylatyn bolady. Osylaı, bes jyldyń ishinde óńir medısınasynyń básekege qabilettiligi birneshe ese artatynyna tolyq senimdimin. Budan bólek, «Rýhanı Janǵyrý» baǵdarlamasy aıasynda dástúrli qazaq medısına ortalyǵyn ashamyz. Men halyq medısınasy jaqsy damyǵan Qytaıda bolyp qaıttym. Ótkendi umytpaýymyz kerek. Babalar murasyn, olardyń tájirıbelerin keńinen qoldansaq, utarymyz kóp bolmak, – dedi Danıal Ahmetov.