Reseı áskerıleri Qazaqstandaǵy Saryshaǵan polıgonynda PRO júıesiniń zymyranyn sátti túrde synaqtan ótkizdi, dep Qamshy.kz aqparat agenttigi RıaNovostıge súıenip jazady.
Reseı áýe-ǵarysh kúshteriniń polkovnıgi jáne PVO-PRO birlestiginiń pármen berýshiniń orynbasary Andreı Prıhodko jańa zymyranǵa qarsy qarý asqan naqtylyqpen shartty túrdegi maqsatqa jetkenin aıtty.
Asa mańyzdy qorǵanys júıesi retinde PRO Máskeýdi syrtqy áýe-ǵarysh shabýyldarynan qorǵaýǵa baǵyttalǵan. Zymyran shabýyly bola qalǵan jaǵdaıda bul júıe ǵarysh keńistigin baqylaýshylarǵa belgi beredi.
Zymyranǵa qarsy qarý Máskeý mańyndaǵy Sofrıno polıgonyna qashan jetkiziletini jónindegi aqparat áli de anyqtalýda.
-Qarýdyń uzaqtyqqa, dáldikke, eksplýatasıa ýaqytyna baılanysty tehnıkalyq anyqtamasy qazirgi tańda qolda bar qarýlardan oq boıy ozyq tur. Atalmysh qarý PRO júıesiniń barlyq basqa qarýlary ispetti belgilengen aımaqty qaýipten qutqarýǵa baǵyttalǵan myqty qorǵanys quraly bolaryna shúbá joq. Ol tek bir ǵana soqqyǵa emes, toptyq zymyran soqqysyna da toıtarys bere alady, -dedi Prıhodko.
Ol PVO-PRO júıesi qazirde jańartylý ústinde ekenin atap ótti. 2017 jyly 24 qarashada Reseı qorǵanys Mınıstrligi Qazaqstandaǵy Saryshaǵanda zymyranǵa qarsy qarýdyń synamasyn ótkizgen edi.
