Qazaqstandyqtar Inchhon halyqaralyq áýejaıynda qamalyp qaldy, - dep habarlaıdy Tengrinews.kz tilshisi Astana turǵynyna silteme jasap. Olardyń onda júrgenine eki kún bolǵan. 

Jazıra Taýbaldınovanyń aıtýynsha, olar Seýlge ákesimen birge medısınalyq tekserýden ótý úshin jáne Olımpıada oıyndaryn tamashalaý úshin kelgen.

"Biz 10 aqpanda keldik. Óz qarajatymyzben tekserilýge jáne soǵan qosa Olımpıada oıyndaryn tamashalaý úshin keldik. Senbiden beri áýejaı aýmaǵynda júrmiz. Ústelderde uıyqtap, asqanadan tamaq iship jatyrmyz, alaıda as máziriniń kóp tamaqtaryn jeı almaımyz. Baryp qaıtatyn bıletterdi, qonaqúı bronyn kórsettik, alaıda bizdi ótkizbeıdi. Sebebin de túsindirmeıdi. Bıletterimiz ben tólqujattarymyzdy alyp aldy. Bizdi jertólege jiberdi, shamamen 20-30 shaqty qazaqstandyq azamat osy jerde júr", - deıdi qyz bala.

Onyń aıtýynsha, kóptegen qazaqstandyq búgin elge qaıtyp ushyp ketken.  

 "Ákemiz ekeýimizdiń erteń Astanaǵa bıletimiz bar. Kóbiniń qaıtatyn bıleti joq. Ońtústik Koreıadaǵy Qazaqstan elshiligine habarlasa almaı otyrmyz", - deıdi Jazıra. 

QR Syrtqy ister mınıstrliginiń baspasóz qyzmetindegiler osy oqıǵaǵa qatysty pikir bildirdi. 

 "Bizdiń dıplomattar mán-jaıdy anyqtap jatyr. Óz azamattarymyzǵa qoldan kelgen kómekti aıap qalmaımyz. Sonymen qatar, Ońtústik Koreıaǵa baratyn kezdegi usynystarmen jiti tanysýǵa keńes beremiz", - dedi vedomstvo baspasóz qyzmetiniń basshysy Ánýar Jaınaqov.