Almatyda Túrksib aýdanynda jigitterge jónsiz jabysqany úshin jetpis qyz ákimshilik jaýapkershilikke tartyldy. Bul týraly qalalyq İİD baspasóz qyzmeti habarlady.
Aýdandyq İİB habarlaýynsha, ákimshilik kodekstiń jańa normalary tek qana jeńil júristi qyzdarǵa ǵana emes, adamdarǵa taýaryn tyqpalaǵan 5 adamǵa, 5 qaıyrshyǵa, úıin jalǵa beretin 10 adamǵa qatysty qoldanyldy.
Tártip saqshylarynyń negizgi kúshi Seıfýllın kóshesin tazalaýǵa ketken sıaqty.
«Sonyń ishinde Seıfýllın kóshesindegi №82 úıdiń tusynda turatyn 32 jasar qyrǵyz azamatshasy ákimshilik jaýapkershilikke tartylyp, Qazaqstannan shyǵaryldy. 2014 jyldyń qorytyndysy boıynsha, Seıfýllın kóshesiniń boıynda 1537 adam jaýapkershilikke tartyldy. 576 adamǵa eskertý jasalsa, 32 adam ákimshilik jazaǵa tartyldy. Myńnan asa adamǵa aıyppul salyndy. Osy aralyqta jeńgetaılyq árekettiń 124 deregi áshkerelendi. Olardyń 36-sy jolda ornalasqan qonaq úılerde oryn alǵan. Adamdarǵa jynystyq qyzmet usynǵan 70 qyz jaýapkershilikke tartyldy», — dedi Túrksib aýdandyq İİB basshysynyń orynbasary Jasulan Báıkenov.
Jaqynda polısıa qyzmetkerleri Seıfýllın kóshesin taǵy da súzip shyqty. Jeńil júristi qyzdar tar kóshelerge jasyrynyp, zańǵa baǵynýǵa qulqy joqtyǵyn kórsetti.
«Jańa ákimshilik kodekstegi qatań normalardyń baryn bile tura jeńil júristi qyzdar zańǵa baǵynýǵa qulyq tanytar emes. Aralarynda birneshe ret polısıa bólimine kelgen adamdar bar. Buryn olardy ýchastokke ákelip, eki-úsh saǵat áńgime júrgizýmen ǵana shekteletinbiz. Qazir túrli ákimshilik jaza qoldanyla bastady. Atalǵan ýchaskede polısıa qyzmetkerleri men ýchaskelik ınspektorlar qoǵamdyq tártip ornatýda. Tipti Ulttyq Gvardıa ulandary da kómekke shaqyrylýda», — dedi Túrksib aýdandyq İİB ákimshilik polısıasy bóliminiń basshysy Farhat Sybanbaev.
QazAqparat
