Astana qalasynyń onomastıkalyq komısıasy elordanyń tórtinshi aýdanyna Baıqońyr ataýyn berýdi usyndy. Bul týraly Qamshy.kz aqparat agenttigi jergilikti Elorda ınfo portalynyń málimetine súıenip habarlady.

Astana qalasynyń Tilderdi damytý basqarmasynyń basshysy Tileýǵalı Qyshqashbaevtyń aıtýynsha, buǵan deıin onomastıkalyq komısıaǵa birneshe ataýlar usynylǵan eken. Atap aıtqanda, Táýelsizdik, Qorǵaljyn syndy  tarıhı ataýlar boldy.

«Tórtinshi aýdannyń ataýy retinde birneshe ataýlar kelip tústi. Sonyń bárin qaraı otyryp, sizdermen aqyldasaıyq dep aldaryńyzǵa kelip otyrmyz. Astana egemendi eldiń elordasy bolǵandyqtan onyń ataýlary kelbetine saı bolýy kerek», - dedi  Tilderdi damytý basqarmasynyń basshysy Tileýǵalı Qyshqashbaev.

Búginde Baıqońyr ǵarysh aılaǵynyń jumysyna 60 jyldan asty.

«Ult maqtanyshtary Toqtar Áýbákirov, Talǵat Musabaev jáne Aıdyn Aıymbetov osy Baıqor aılaǵynan  ǵaryshqa ushyp, abyroıymyzdy asqaqtatqan bolatyn. Sondyqtan jańa aýdanǵa adamzat tarıhynda orny bar, aty altyn árippen jazylǵan Baıqońyr ataýyn berýdi usynamyz» - dedi onomastıkalyq komısıa tóraǵasy.

Qoǵamdyq keńeske qatysqan maslıhat depýtattary komısıa usynysyn biraýyzdan qoldady. Endi atalǵan ataý halyqtyń talqysyna salynady.

Aıta keteıik, Astana qalasynyń Sáýlet jáne qala qurylysy basqarmasynyń málimetinshe, elordanyń tórtinshi aýdanynda shamamen 150 kóshe bolady.

 Elordada qurylyp jatqan jańa aýdanǵa Almaty jáne Saryarqa aýdandarynyń aýmaǵynan ishinara 16,5 myń gektar jer beriledi.