Uly Abaıdyń 170 jyldyq mereıtoıyna oraı, Shyǵys Qazaqstanda jazǵa salym Abaıdyń ómiri men shyǵarmashylyǵymen baılanysty tarıhı  oryndardy aralaıtyn «Abaımen ótken kúnder» týrısik baǵdary  ashylady, dep habarlaıdy SHQO Aqparattyq ortalyǵy.

Uly Abaıdyń 170 jyldyǵyn shyǵys jurtshylyǵy oblys kóleminde keń aýqymda atap ótýdi josparlap otyr. Tarqata aıtqanda, negizgi is-sharalar Hakimniń týǵan jeri Jıdebaıda uıymdastyrylyp, oblystyń barlyq mádenı mekemeleri men bilim ordalarynda Uly aqyndy ulyqtaý sharalary ótkiziledi. Aqynnyń mereıtoıyn atap ótýge aımaqtyń bıznes jáne komersıalyq emes uıymdary, qoǵamdyq birlestikter, kórnekti óner jáne mádenıet qaıratkerleri, oblys turǵyndary jumyldyrylmaq.

Mereıtoı qarsańynda Abaı aýdanyndaǵy Jıdebaı aýyly, «Abaı-SHákárim» memorıaldyq kesheni, Abaıdyń Jıdebaıdaǵy murajaı-úıi týrıserdiń kóptep keletin orynyna aınalatyndyqtan, SHQO ákimdigi týrıserge qolaıly jaǵdaı jasap, óńirlik týrızmdi damytýǵa den qoıyp otyr. Abaı aýdanyna jumys sapary barysynda oblys ákimi Danıal Ahmetov murajaı-úıiniń janyndaǵy qurylysy aıaqtalmaǵan nysandy jyl boıy jumys isteıtin qysqy tıptegi qonaq úı túrinde salý úshin memleket tarapynan qarjy bólinetinin málimdegen bolatyn. Sondaı-aq, aǵymdaǵy jyly jazda Abaıdyń ómiri men shyǵarmashylyǵymen baılanysty tarıhı  oryndardy aralaıtyn «Abaımen ótken kúnder» týrısik baǵdary jumys júrgizbek.

Sonymen qatar, Uly aqynnyń mereıtoıyna oraı, óńirde  kórnekti mesenat Medǵat Quljanovtyń qoldaýymen ataqty aǵylshyn kompozıtory Karl Djenkıns jazǵan «Abaı-SHákárim» oratorıasymen SHQO ákiminiń sımfonıalyq orkestri ártisteri, aralas hor men fólklorlyq tobynyń konserti, Búkilálemdik poezıa kúni (21 naýryz) «Abaı poezıasy» álem tilderinde» festıvali, Jıdebaıda respýblıkalyq aqyndar aıtysy, Qara sózder boıynsha monospektaklder, Abaı shyǵarmalary boıynsha konserttik baǵdarlamalar ótkiziledi. Óskemen men Semeı qalalarynda «Bizdiń Abaı» elektrondyq kitaphanasynyń tusaýy kesiledi. Atalmysh saıtqa «Abaı oqyǵan kitaptar» sırek qorynyń vırtýaldy kórmesiniń kitaptary enedi.