«Qazaq handyǵyna - 550 jyl» jyr músháırasyna!
Tulpar minez tuıaǵy edik tektiniń, Tebireneıin, jer jahanǵa jetti únim. Táýelsizdik – táńir bergen tuǵyrym, Jar salatyn eńseli elmiz dep búgin. Kúlli álem tańdanyspen qaraıtyn, Shuǵylasyn syılady altyn araı kún. Eri dana, jeri baıtaq kıeli, Qyzǵanyshyn qozdyratyn talaıdyń. Bekem irge beıbitshilik urany, Ata tarıh altyn aına jyr-áni. Mártebesi kók týymen aspandap, Kún astynan qalyqtaǵan qyrany. Syr tolǵasam abyz baba arydan, Qaısarlyǵy qara taýdan daryǵan. Ulanymyn ulaǵatty uly eldiń, Kók semserin kók jartasqa janyǵan. Quba jondy kókjal jortqan dalasy, Qut ıigen saǵym qýǵan salasy. Balbalymen shejiresin shertetin, Altaı, Arqa, Atyraýdyń arasy. Rýhy asqaq tý kótergen bórili. Ar-namysyn taptatpaǵan ór uly. Qarasha eldiń shańyraǵy kıeli, Bı, áýlıe, batyr týǵan tóri uly. Ǵazız janyn qurban etken halqy úshin, Parasatpen áıgilegen bar kúshin. Taǵylymdy tasqa basyp tańbasyn, Jer sharynyń enshige alǵan jartysyn. Taýqymetti taǵdyr keship san alýan, Ár dáýiri qanmen termen jańarǵan. Atam qazaq Tonykók pen Kúltegin, Túbim túrki, Ǵunnan, Saqtan taralǵan. Tónip basqa talaı náýbet san synaq, Qas dúshpany bolǵanda da janshymaq. Esilderi eńkeıtpegen eńsesin, Esten tanyp qulasa da qansyrap. Meken etip ulan-ǵaıyr ólkeni, Ósken darhan peıili men órkeni. Handyq quryp babam Kereı, Jánibek, Nurly jolǵa jalǵasty eldiń erteńi. Sondan beri ǵasyr ótti bes jarym, Asýlardan asty kerýen kósh qalyń. Dúrsilkintken dúnıeni dúbiri, Eldigimniń aıǵaǵy bul eske alym. Salt-dástúrin izgilikten jınaǵan, Tasqyndasa arnasyna syımaǵan. Qasıetińnen aınalaıyn áz baba, Urpaǵyna uly mura syılaǵan. Búgin málim ǵaryshqa da, aıǵa aty, Atoılasa arystandaı aıbaty. Qushaq jaısa tógiletin meıirim, Qaharlansa jaý jaıratqan qaıraty. Tirligine jaýap berer nanymdy, Biz solardyń jalǵasymyz jalyndy. Jaratqanǵa sheksiz-sheksiz táýbe etem, Qadir tutyp árbir atqan tańymdy.
Aıdyn Kálimhanuly – 1969 jyly 28 shildede dúnıege kelgen. “Qazaq tili men ádebıeti” mamandyǵy boıynsha bilim alǵan. Alǵashqyda kásipodaq, mádenıet salalarynda jumys jasaǵan ol 2008-2012 jyldar aralyǵynda Almaty oblystyq “Alataý” qoǵamdyq-saıası gazetinde jýrnalıs jáne ádebıet bóliminiń meńgerýshisi bolyp mindet atqarǵan. 1986 jyldan bastap qalam ustaǵan onyń túrli janrlarda jazylǵan shyǵarmalary elimizde jáne shetelderde jaryq kórgen 20-ǵa jýyq kitaptarǵa engizilgen. «Beý dúnıe» atty jyr jınaǵynyń avtory. Qazir «Taldyqorǵan» gazetinde qyzmet etedi. Oblystyq, respýblıkalyq, jáne shetelde ótken 20-dan astam jyr músháırasynyń jeńimpazy. Ol óziniń jáne qazaq halqynyń áıgili aqyn-jazýshylarynan bastap, Baıronnyń, Pýshkınniń shyǵarmalarynan 500-ge tarta óleń-tolǵaýlar men qıssa-dastandardy jatqa oqıdy.
