Byltyr Qazanda ótken TÚRSKOI Turaqty keńesiniń 32-shi otyrysynda qabyldanǵan sheshim boıynsha, Túrkimenstannyń Mary qalasy – 2015 jyldyń túrki dúnıesiniń mádenı bas qalasy bolyp bekitildi. Osyǵan oraı Qazannan kelesi estafetany alǵan Mary qalasynda «Mary – túrki dúnıesiniń mádenı bas qalasy 2015» jylynyń saltanatty ashylý rásimi ótti.
Marydaǵy «Rýhyet» memlekettik saraıynda ótken sharaǵa Túrkimenstannyń Májilis depýtattary, túrkitildes elderdiń Mádenıet vedomstvalary men qoǵamdyq uıymdardyń ókilderi, ǵalymdar men mádenıet maıtalmandary, jýrnalıser men jastar qatysty. Sondaı-aq, Halyqaralyq TÚRKSOI uıymynyń ókilderi men Qazaqstan, Ázirbaıjan, Qyrǵyzstan, Túrkıa, Makedonıa, Bosnıa Gersogavına, Vengrıa, Bolgarıa, Gagaýzıa (Moldova Respýblıkasy), Reseı Fedearsıasynyń quramyndaǵy Tatarstan, Bashqortstan, Hakasıa, Týva, Saha-Ákýtıa, Kalmykıa, Altaı syndy túrki áleminiń túkpir-túkpirinen shyǵarmashylyq toptar oryn aldy.
Saltanatty ashylý rásimine arnaıy sálem hat joldaǵan Túrkimenstan Prezıdenti Gýrbangýly Berdimuhamedov tarıhı sharaǵa qatysyp otyrǵan barlyq qonaqtardy aıtýly merekelik kúnmen quttyqtap, adamzat órkenıetiniń tarıhynda eleýli orny bar ejelgi Mary qalasynyń túrki dúnıesindegi mánin ashyp, túrikmen halqynyń ejelden kele jatqan salt-dástúri, óneri men mádenıeti álem halyqtarynyń jaqyndasýyna qyzmet etetindigin tilge tıek etti. Merekelik sharanyń tarıhı mańyzdylyǵyn baıan etken TÚRKSOI Bas hatshysy Dúısen Qaseıinov Túrkimenstan Prezıdentine halyqaralyq sharanyń ótýine qoldaý kórsetip, túrki dúnıesiniń óner men mádenıet salasyna qosqan súbeli úlesi úshin alǵys bildirdi. «Búgingi kúni, - degen TÚRKSOI Bas hatshysy, - «Túrki dúnıesiniń mádenı bas qalasy» jobasynyń aıasynda etafetany qabyldap alǵan Ejelgi Mary qalasy IýNESKO-nyń Búkil álemdik tizimine engeni barshaǵa málim. Osy qasıetti jerde álemdik órkenıetiniń ejelgi ortalyqtary men jalpy mádenı muranyń qundylyqtaryn sezinýge bolady. Sondyqtan Mary qalysynyń teńdessiz mádenı murasy túrki dúnıesiniń mádenı ortalyq bolýǵa ábden laıyqty,» - dep sharanyń mánin tereńdete tústi.
Shara sheńberinde ótken konsertke elimizdiń talantty ónerpazdary qatysty. «Aq jaıyq» ansambliniń T.Aqbóken, A.Noǵaıbaeva, Á.Nabıeva, A.Erjanova, T.Jumaǵalıev, G.Jumataeva, A.Jalǵapov, B.Aqtaev, E.Baımuratov, S.Baımenova syndy ónerpazdary qazaqtyń dástúrli mýzykasymen túrkitildes elderden kelgen qonaqtardy tánti etti. Ásirese belgili dombyrashy Temir Aqbókenniń túrikmenniń ulttyq aspaby dýtarmen qazaqtyń kúılerinen poppýrı oryndaǵanda túrikmen jurtshylyǵy dán rıza boldy, - habarlaıdy TÚRKSOI-daǵy Qazaqstannyń ókili Málik Otarbaev.
