«Kúltegin» túrki jazba eskertkishine arnalǵan, nomınaly 1000 teńgelik banknottardy qabyldaýdan bas tartý jaǵdaılarynyń jıilenýine baılanysty, Ulttyq Bank bul banknottardyń zańdy tólem quraly bolyp tabylatynyn eske salady. Olar boıynsha aınalys merzimi belgilenbeıdi. Bul banknottar aınalymnan tabıǵı tozýyna qaraı alynady, dep jazady Qamshy.kz aqparat agenttigi Ulttyq banktiń baspasóz qyzmetine silteme jasap. 

Qazaqstan Respýblıkasynyń Islam Konferensıasy Uıymyndaǵy tóraǵalyǵyna arnalǵan 1000 teńgelik jáne Qazaqstannyń Eýropadaǵy qaýipsizdik jáne yntymaqtastyq jónindegi uıymdaǵy tóraǵalyǵyna arnalǵan 1000 teńgelik eskertkish banknottar da zańdy tólem quraly bolyp tabylatynyn eske salady. Olar boıynsha aınalys merzimi belgilenbeıdi. Bul banknottar aınalymnan tabıǵı tozýyna qaraı alynady.

Qazaqstan Respýblıkasynyń Ákimshilik quqyq buzýshylyq týraly kodeksine sáıkes aınalystaǵy banknottar men monetalardy qabyldaýdan bas tartý eskertý jasaýǵa, al ákimshilik jaza salynǵannan keıin bir jyl ishinde qaıtadan bas tartý shaǵyn kásipkerlik sýbektilerine nemese komersıalyq emes uıymdarǵa – bes, orta kásipkerlik sýbektilerine – on, iri kásipkerlik sýbektilerine jıyrma bes aılyq eseptik kórsetkish mólsherinde aıyppul salýǵa ákep soǵady. Bankterdiń jáne bank operasıalarynyń jekelegen túrlerin júzege asyratyn uıymdardyń banknottardy qabyldaýdan, usaqtaýdan jáne aıyrbastaýdan bas tartýy elý aılyq eseptik kórsetkish mólsherinde aıyppul salýǵa ákep soǵady.

Suraqtar týyndaǵan jaǵdaıda Qarjylyq qyzmetterdi tutynýshylardyń quqyqtaryn qorǵaý jáne syrtqy komýnıkasıalar basqarmasyna +7 (727) 2788 058, 2619-234, 2704-585 telefondary boıynsha jáne Qolma-qol aqshamen jumys júrgizý basqarmasyna +7 (727) 2704-569 telefony boıynsha habarlasýǵa bolady.