Bul jóninde oblys basshysynyń orynbasary Jaqsylyq Omar Feısbýktegi óz paraqshasynda jazdy.

«Ótkende «Jetisý» telearnasynyń «Bolmys» baǵdarlamasynda Gúlim Núrkebaevanyń taǵdyryn estigen el egildi. Sodan keıin arnaıy Analar úıine baryp, tanystym. Bar jaǵdaıdan habardar bolǵan oblys ákimi Amandyq Ǵabbasuly Gúlimmen kezdesip, Taldyqorǵannan páter berdi. Sábıimen 6 aılyq reabılıtasıadan ótkennen keıin óz úıine ıe bolady», – dep jazǵan Jaqsylyq Omar.

Gúlim Núrkebaeva Kerbulaq aýdanynda dúnıege kelgen. Ol 12 jasynan bastap sińlisi ekeýi balalar úıinde ósken. Anasynan erte aıyrylǵan. Ákesi jaıly múlde bilmeıdi. Bala kúinne áke-sheshesi aıyrylysyp ketken. Eseıgen soń ár jerde jumys istep, kolejde bilim alǵan.

24 jastaǵy Gúlim Núrkebaevanyń aıtýynsha, alty jyl bir jigitpen kezdesip júrgen. Alaıda onyń ata-anasy jetim qyzdy kelin qylýǵa túbegeıli qarsylyq tanytypty.

«Meniń týystarym bar, myna jetim qyzdy kelinim dep elderge qalaı kórsetemin. Eger osy qyzǵa úılenetin bolsań, men anańmen ajyrasyp ketemin. Toıymyzǵa úsh kún qalǵanda ákesi osylaı qarsylyq bildirdi», – degen bolatyn «Bolmys» baǵdarlamasy barysynda Gúlim.

Aıaǵy aýyr ekenin aıtyp jigitiniń úıine barǵanymen ata-anasy túnniń bir ýaǵynda úıinen qýyp shyqqan. Keıin amaly taýsylǵan soń Gúlim Analar úıine barǵan.