Radıoelektronıka jáne baılanys áskerı-ınjenerlik ınstıtýtynyń kýrsanttary aralas jekpe-jek sheberi Ardaq Nazarovpen kezdesti. Sportshy jas urpaqtyń Otanǵa degen patrıottyq rýhyn kóterý, qazirgi qoǵamda tamyryn tereńge jaıyp bara jatqan jastar arasyndaǵy óz–ózine qol jumsaý oqıǵalaryn boldyrmaý tóńireginde sóz sóıledi, dep jazady Qamshy.kz aqparat agenttigi. 

Óz-ózine qol jumsaý, ıaǵnı sýısıd, búgingi qoǵamnyń ózekti máselesine aınalǵany qashan. Tipti, bul sózdiń úırenshikti bolyp ketkeni sonshalyq, atalmysh qubylys eshqandaı úreı týdyrmaıtyndaı kórinedi. Qazaqstan Respýblıkasynyń Bas prokýratýrasy quqyqtyq statısıka jáne arnaıy esep boıynsha komıtetiniń tóraǵasy Baǵdat Mýsınniń málimdeýinshe, bizdiń el sýısıd faktisi tirkelý boıynsha álemde tórtinshi orynda tur.

Statısıkaǵa úńilsek er adamdar áıelderge qaraǵanda 4 ese jıi óz-ózine qol jumsaıdy eken. 2016 jyly Qazaqstanda sýısıd 5,5 paıyzǵa (3735-ten 3942-ge) artty jáne óz-ózine qol jumsaý áreketteri 2,1 paıyzǵa (6047-den 5922-ge) deıin tómendedi. 2017 jyldyń birinshi toqsanynda sýısıd kórinisi 8,7 paıyzǵa (931-den 850-ge), al ózi-ózine qol jumsaý áreketteri 35,4 paıyzǵa (1563-dan 1010-ǵa) deıin tómendegen.

Osy kúrdeli máselege baılanysty QR QM Radıoelektronıka jáne baılanys áskerı-ınjenerlik ınstıtýtynda aqpannyń 19-y men 28-i aralyǵynda jeke jáne otbasylyq shıelenisterdi eskertý jáne ózine-ózi qol jumsaý kórinisteriniń aldyn alý jóninde onkúndik shara uıymdastyryldy.  Kýrsanttar erejesiz jekpe-jekten álemniń úsh dúrkin chempıony, erligin – elge mura etken Ardaq Nazarovpen kezdesti. Bul kezdesý Instıtýt basshylyǵy men psıhologynyń uıymdastyryýmen ótti.  Spıker jas urpaǵymyzdyń Otanǵa degen patrıottyq rýhyn kóterý, qazirgi qoǵamda tamyryn tereńge jaıyp bara jatqan jastar arasyndaǵy óz–ózine qol jumsaý oqıǵalaryn boldyrmaý tóńireginde sóz sóıledi. Kýrsanttarǵa qazaqtyń batyry Baýyrjan Momyshulynyń erligi, surapyl soǵys jyldarynda óziniń asqan sheberligimen jaýdyń betin qalaı toıtarys jasaǵany, soǵys óneriniń qyr-syryn meńgergen bilikti jaýyngerlik qasıeti jaıynda mol málimetter aıtyldy. Ardaq, batyr aǵamyzdyń erlikteri jóninde jazylǵan belgili orys jazýshysy Aleksandr Bektiń «Arpalys» («Volokolam shosesi») povesine de toqtala ketti.

Sonymen qatar Ardaq Nazarov ata-babalarymyz, handarymyz ben batyrlarymyzdyń erlikterin de umyt qaldyrmaı, tól tarıhymyzdan da derekter keltirdi. Tóle bıdiń tálim-tárbıesinde bolǵan Abylaıhannyń boıyna sińgen Qazaq dalasynyń danalyǵyn, baba aqyly men parasatyn, el bıleý qabiletin, antalaǵan jaýǵa qarsy qazaq halqynyń basyn biriktirip toıtarys bere alǵan basshy qasıetteri týraly keremet áńgime qozǵady.

Kezdesýdiń sońynda Ardaq baýyrymyz ómirlerin áskerı qyzmetke arnaǵan inilerine: «Sender elimizdiń bolashaǵysyńdar. Eldiń qorǵany ári tizginustar azamatsyńdar. Qazaqtyń qanynan sińgen tekti qasıetin boılaryńa sińirip, batyrlyq rýhyn saqtap, elimizdi bıik belesterge bastap, alynbas qamal men bıik shyńdardy baǵyndyrýlaryń qajet. Tek qana bilektiń kúshine emes, sonymen qatar bilimge de zeıin qoıǵandaryń abzal», — dep aǵalyq aqylyn aıtyp, tilegin bildirdi.

Al kýrsanttar búgingi kúnniń batyry Ardaq aǵalarymen estelikke sýretke túsip, odan alǵan keremet áserlerimen bólisip, qýanyshtaryn jasyra almady. Barlyǵy da onyń adaldyǵyna, tereń oıly azamattyq tulǵasyna tánti boldy. Bir sózben aıtqanda, Ardaq, isi men sózi sáıkes keletin jan.

Daýrenbekova Sandýǵash,
Radıoelektronıka jáne baılanys áskerı-
ınjenerlik ınstıtýtynyń psıhology,
podpolkovnık.