Búgin Qazaqstan musylmandar dinı basqarmasynyń uıymdastyrýymen Astanada Eýrazıa musylman ǵulamalarynyń forýmy ótýde, dep habarlaıdy Qamshy.kz aqparat agenttigi. 

Halyqaralyq forýmǵa QR Parlamenti Senatynyń Tóraǵasy Qasym Jomart Toqaev, QR Din isteri jáne azamattyq qoǵam mınıstri Nurlan Ermekbaev, Qazaqstan musylmandary dinı basqarmasynyń tóraǵasy, Bas múftı Serikbaı qajy Oraz, Senat jáne Májilis depýtattary, teolog-ǵalymdar, oblystyń bas ımamdary qatysty.

Forýmda QR Bas múftıi Serikbaı qajy Oraz Eýrazıa musylmandaryn biriktiretin ortaq tarıh pen mádenıet baryn aıtyp ótti.

«Syrttan kelgen tasqyndarǵa tótep berý úshin Eýrazıa musylmandary mádenı jáne rýhanı ıntegrasıany jandandyrýymyz kerek. Biz dinı tulǵalarymyzdyń ónegelerin dáripteýimiz kerek. Tulǵataný izdenisterin júrgizip, birneshe tilde ortaq hrestomatıalarmen oqýlyqtar shyǵarýdy kerek dep sanaımyn. Sondaı-aq ortaq tulǵalardyń jyl saıyn dástúrli oqýlaryn júıeli túrde uıymdastyrǵan abzal. Osyndaı ıgi jobalarmen rýhanı ıntegrasıamyzdy arttyra túsemiz degen senimdemin. Eýrazıa musylmandary radıkalızmniń kez kelgen túrin onyń ishinde din atyn jamylǵan sopylyq áreketterdi eshqashan qoldamaýǵa tıisti. Kerisinshe ıslamǵa qatysty qorqynysh oryn almas úshin dinı radıkalızmge oryndy syn aıtyp, ortaq ustanymdarymyzdy jarıalap otyrýymyz kerek. Eýrazıa keńistigindegi musylman halyqtary negizinen zaıyrly memleketterde ómir súredi. Álbette zaıyrly memlekettiń ózindik erekshelikteri bar. Degenmen dindi saıasılandyrmaý qaǵıdasy zaıyrly memleketterdiń barlyǵyna ortaq dep sanaımyn. Olaı bolsa biz qandaı jaǵdaıda da dindi saıasattyń quralyna aınaldyrmaýymyz qajet. Qazirgi álemdegi kúrdelengen dinı ahýal din qyzmetkerleriniń jaýapkershiligin odan saıyn arttyra tústi. Osy maqsatta múftıat eki ret respýblıkalyq ımamdar forýmyn, Qazaqstan musylmandarynyń tuǵyrnamasy, «Imamnyń tulǵalyq kelbeti», «Úzdik zıatkerlik ımam» syndy tálimdi qujattardy qabyldady. Múftıattyń bastamasymen ortalyq Azıa ǵulamalarynyń forýmy da ótti. Atalǵan is-sharalar dinı basqarma jumysyn jańa deńgeıge kóterdi. Qadirli aǵaıyn san ǵasyrlyq tarıhy bar halqymyz túrik mádenıetiniń mırasqor urpaǵy. Biz sharıǵat qaǵıdasy men dala zańyn úılestirip, úlkenge izet, kishige qurmet ustanymyn tý etip kelgen elmiz. Táýelsiz jas memleketimiz ultaralyq dinder arasyndaǵy alaýyzdyqtar men daý-damaılarǵa tosqaýyl qoıýǵa talpynyp, tynyshtyq pen tatýlyqty basty tirek etip keledi. Sonyń jarqyn mysaly retinde Elbasy bastamasymen 2003 jyldan beri álemdik jáne dástúrli dinder kóshbasshylarynyń bes dúrkin sezdin ótkizdik. Óıtkeni barshamyz Adam ata men Haýa ananyń urpaǵymyz. Alla Taǵala Qasıetti Quranda «Ýa, adam balasy shúbásiz senderdi bir er, bir áıelden Adam men Haýadan jarattyq. Sondaı-aq bir-birińdi tanýlaryń úshin senderdi ulttar men rýlarǵa bóldik», dep baıandaǵan. Qazaq halqynda bir atanyń balasyndaı, bir qoldyń salasyndaı degen naqyl bar. Endeshe barshamyz bir ǵalamshardy meken etip otyrǵannan keıin bir atanyń balasyndaı yntymaqta ómir súrýge tıistimiz», - dedi bas múftı Serikbaı qajy Oraz.

Halyqaralyq forýmnyń maqsaty men mindeti – jańa zamandaǵy musylman qaýymynyń jaýapkershiligi men ózara túsinigin qalyptastyrý, álemdegi syn-qaterlerge jaýap berý, búgingi musylman úmbetiniń dinı ekstremızm men terorızmge qarsy ımýnıtetin arttyrý, ortaazıalyq tarıhı dinı mekteptiń rólin arttyrý, Elbasynyń «Rýhanı jańǵyrý» bastamasyna oraı qazaq topyraǵynan shyqqan álemge tanymal dinı tulǵalardyń eńbegin nasıhattaý, Eýrazıa elderiniń ortaq pátýalar bazasyn qalyptastyrý, Eýrazıa keńistiginde dinı yqpaldastyq pen rýhanı qaýipsizdikti qamtamasyz etýge úles qosý, t.b.