Bostandyq – kók baıraq

Zamannyń qulyndaı tastandy,

Qansha ret tabanǵa taptaldyq.

Babamnyń qanymen kóktegen,

Men seni súıemin, kıeli bostandyq!

Teńizdeı tolqytqan kóz jasyn,

Bostandyq − Alashtyń sóz basy.

Sen úshin mert bolyp Álıhan,

Keneniń kesildi áz basy.

Sen dese júregim eljirep,

Kóńilde týlaǵan seń júred.

Turady Alashtyń aryndaı,

Kók týym kógimde jelbirep.

Tym asaý aǵyndar qaqpaılap,

Zamanym salsa da otqa aıdap.

Men seni súıemin, bostandyq −

Kók aspan,

Kók bóri,

Kók baıraq!

Shákárimniń Shyńǵystaýmen qoshtasýy

Eı, Shyńǵystaý, Shyńǵystaý!

Qan tolyp qara janarǵa,

Qaıǵyrdym sońǵy qararda.

Qaıqy da qylysh qyzyl til,

Qoshtasar sátte qamalma!

Baýyryń –baısyn, salqyn baq,

Samalyń –saýmal,  ańqyldaq.

Qyz erin − qyzyl búldirgen,

Qymsyna baryp úzdirgen,

Asyly arý qoınyńa

Arsyzdar qolyn salar ma?!

Shahıtter jatqan jurtyma,

Shapaǵat qylǵaı jan Alla!

Eı, Shyńǵystaý, Shyńǵystaý!

Shashyńdy qýdaı aǵartqan,

Bitpeıtin sher men muń qaldy.

Keshegi kerdeń Alashtan,

Keýdesi bıik kim qaldy?!

Asyldan atam Qunanbaı,

Ordasy onyń tul qaldy.

Kúnásiz qara topyraq,

Tósimnen aqqan qyzyl qan,

Simirgen kezde surlandy.

Jel jylap turyp joqtaǵan,

Muńly da syrly jyr qaldy.

Qur qudyq mańy  qyrań bel,

Qyrańǵa taǵy shyǵar ma el?

Qudaısyz qyryq qaraqshy,

Astynda ketti qurandy er.

Eı, amanat alǵan aq tánim,

Osy ma edi qular jer.

Súıegim betin jabarǵa,

Tabylmaı ketti bir arly er.

Eı, Shyńǵystaý, Shyńǵystaý!

Qyzaryp tursa kún kókte,

Qylqımas almas synsa da,

Qynabyn jatqa kirletpe.

Qynabyn jatqa kirletse,

Erteńgi týǵan jas bala,

Jaýtańkóz bolyp júrmes pe?!

Qyryńa tókken qyzyl qan,

Qyrmyzy kóktem bolǵanda,

Qyzǵaldaq bolar kún jetse!

İle

Ekpinińdi jutty ma, sol tasbaýyr jaǵalaý,

Nege óksısiń tunshyǵyp, meni ósirgen anam-aý?

Óz otyna órtenip, qulap barady qyzyl kún,

Qyzyl kúndi kórdim de, seńdeı bolyp buzyldym.

Túnmenen tún jıekte japsarlasa bergende,

Sonaý kóktiń kózinen bir aq sáýle kórgem men.

Sol sáýlege asyqtyń, tolqyndaryń jarysyp,

Seniń tamshyń men edim, tolqı aqqan jany ushyp.

Jettim appaq sáýlege júregimdi nur óbip,

Túndeı tereń arnalym, túnde qaldyń túnerip.

Túnge qarap tolqımyn, seni oılaımyn keı kúni,

Úndemeısiń sen nege, eı, túrkiniń Jeıhuny.

Sen jylaısyń sherlisiń, biraq zaman taskereń,

Onyń sózi basqa sóz, onyń muńy – basqa óleń.

Meniń uly babamnyń tulparyndaı ekpindim,

Men sen bolyp tolqydym, tolqynymdy kókke urdym.

Teńiz quısam óshpeıtin ózegimdi órt jaılap,

Zaman alyp barady, meni sendeı qaqpaılap.