Baqytjan Saǵyntaev «Shevron Eýropa, Eýrazıa, Taıaý Shyǵys. Barlaý jáne Óndirý» prezıdenti Todd Levımen kezdesý ótkizdi dep habarlaıdy Qamshy.kz aqparat agenttigi.
Kezdesý barysynda munaı-gaz salasyndaǵy kompanıamen yntymaqtastyqty odan ári jalǵastyrý máseleleri talqylandy. Atap aıtqanda, «Teńizshevroıl» JSHS, Qarashyǵanaq jobasy jáne Kaspıı qubyr konsorsıýmy boıynsha ózara is-qımyl máseleleri qaraldy.
«Shevron» kompanıasy «Pacific Oil Coast Co» ataýymen 1879 jyly qurylǵan. Shtab-páteri San-Ramon qalasynda ornalasqan (Kalıfornıa, AQSH), operasıalary álemniń 180 elinde júrgiziledi. Qyzmetkerler sany shamamen 62 myń adam. Kompanıa kapıtaly $232 mlrd quraıdy.
Qazaqstanda «Shevron» «Teńizshevroıl» JSHS-na (50%), Qarashyǵanaq jobasyna (18%), Kaspıı qubyr konsorsıýmyna (15%) qatysady. «Teńizshevroıl» JSHS (TSHO) jobasy týraly kelisimge 1993 jylǵy 2 sáýirde QR men «Shevron» kompanıasy arasynda qol qoıyldy. Kómirsýtegin barlaý jáne óndirýge arnalǵan lısenzıa TSHO-ǵa 1993 jyly 40 jyl merzimge berildi. 2018 jylǵa arnalǵan munaı óndirý jospary 27,8 mln tonnany quraıdy.
