Shyǵys Qazaqstan oblysynyń ákimi Danıal Ahmetov sel júrgen aýdanǵa baryp, turǵyndarmen kezdesýinde osylaı dep ýáde berdi. Sondaı-aq, óńir basshysy úılerdiń tabıǵı apattan keıingi jaǵdaıymen tanysty, dep habarlaıdy Qazaqstan Ulttyq telearnasy.

Aıagóz ózenindegi bógetti baryp kórip, qaýipsiz jerge kóshirilgen otbasylarmen kezdesti. Eki kún boıy jaýǵan qar aralas jańbyr Aıagóz aýdany turǵyndaryn kúndiz kúlki, túnde uıqydan aıyrǵany jasyryn emes. Osy aralyqta ásirese, úılerin sý shaıyp ketkender kóz ilmedi. Danıal Ahmetov qıyn kezde qysylǵan sol adamdardyń birazymen kezdesti, birneshe baspanany aralap kórdi. Búgingi málimetke sáıkes 148 úıge sý kirgen, 10-ǵa jýyǵyna jóndeý jumystary júrgizilýi kerek jáne 8 úı turýǵa múldem jaramsyz,-dep tanylyp otyr.

Zardap shekkenderdiń biri jalǵyzbasty ana. Ol úsh balasymen dalada qalǵan bolatyn. Biraq, óńir ákimi jaqsy habarmen súıinshiledi. Halyq ákimdi jan-jaqtan qaýmalap basyna túsken aýyrtpalyqtaryn aıtyp qalýǵa tyrysty. Olardyń bazynasyn sheshý jergilikti basshylarǵa tapsyryldy. Abyroı bolǵanda adam shyǵyny joq. Al, tasqyn sý talqandap ketken aınalany tazartýǵa 400-deı azamat tartylǵan. 50 arnaıy tehnıka taǵy bar. Budan soń Danıal Ahmetov bastaǵan top Aıagóz ózenine bardy. Ondaǵy bógetti áli de topyraq tógip bıiktetý kerektigi eskertildi.

Óıtkeni, tabıǵat tosyn minez tanytsa, abdyrap qalýǵa bolmaıdy. Aldyn nyqtap alý qajet. Al, selden sekem alǵan jurtqa alǵashqy kómek retinde qarjy bólinetin boldy. Bul kúndelikti turmystyq qajettilikti óteý úshin ǵana. Tasqyn sý saldarynan 400-deı adam qaýipsiz jerge kóshirildi. Sonyń ishinde 20 otbasy aýdandaǵy №6 mektep-ınternatyna ornalastyryldy. Olardyń qatarynda úısiz-kúısiz qalǵandar da bar. Biraq, bastaryna baspana tıgenshe sol jerdi panalaıtyn bolady. Kıimderi bútin, qaryndary toq. Tórt mezgil taǵam berilip turady. Turǵyndardyń qol ushyn berip jatqan jandarǵa rızashylyǵy sheksiz. Tek bastary quralyp, baspanaǵa kirýdi ańsaıdy.

Buryn-sońdy Aıagózde mundaı jaǵdaı bolmapty. Baıyrǵy halyq jańbyr qansha quısa da kóshe arasyn aralaı aǵatyn aryqtyń sýy arnasynan aspaǵan. Olar tek bir nársege kúdiktenedi. Úsh bıik dep atalatyn jerde bóget jarylyp, tasqyn sý sodan bolǵan,-degen boljam jasap otyr. Munyń anyq-qanyǵyn oblys ákimi anyqtaıtyn boldy. Arnaıy top tik ushaqpen tóńirekti túgel sholyp shyǵyp, aldaǵy 4 kúnde naqty málimet beretinin jetkizdi.