Memleket basshysy Nursultan Nazarbaevtyń shaqyrýymen búgin elimizge Tájikstan prezıdenti Emomalı Rahmon resmı saparmen keldi, dep jazady Qamshy.kz aqparat agenttigi.

«Tájikstan delegasıasyna qosh keldińizder deımiz. Qanshama jyldardan bergi dostyq qarym-qatynasymyzdyń, baýyrlas el retinde aralasýymyzdyń arqasynda biz úlken senimge ıe boldyq. Eki eldiń arasynda qandaı da bir saıası máseleler týyndaǵan emes. Biz qashan da barlyq baǵyttar boıynsha Tájikstandy qoldaýǵa, kómek kórsetýge daıynbyz», - dedi Elbasy Tájikstan prezıdentimen kezdesý barysynda.

Búgingi resmı kezdesýde eki eldiń basshylary biraqatar máselelerdi talqylap, jańa memleketaralyq kelissózderge qol qoıady dep kútilýde.

Sonymen qatar, Qazaqstan men Tájikstan azamattarynyń sol elderge kelip-ketý erejesin, kóshi-qon erejeleri jáne de qarsy taraptyń azamattaryn elde qabyldaý erejelerine de qatysty kelissózder jasalmaq.

Aıta ketsek, Eki jaq joǵary deńgeıde kelissózder júrgizip, áriptestik kókjıegin keńeıtpek.  Sońǵy jyldary eki eldiń qarym-qatynasy qarqyn alyp keledi. Byltyr ózara  alys-beris 800 mln dollarǵa jýyqtaǵan. 2016 jylmen salystyrǵanda ósim 32 paıyz. Endi osy qarqynnan taımaı, saýda-sattyqty eseleı túsý mańyzdy. Osy oraıda búgingi kelissózderiń qos el úshin de mańyzy zor.

Kóshbasshylar óńirlik, halyqaralyq kún tártibindegi máselelerge de nazar aýdarady dep josparlanyp otyr. Buǵan qosa, kólik-logıstıka salasyndaǵy seriktestikke serpin berý de oıda bar. Aldaǵy ýaqytta ózbek-tájik shekarasynda kólik ótkizetin 16 qosyn ashylady. Bul jaǵdaı Ortalyq Azıa memleketteriniń alys-berisin arttyrýǵa septigin tıgizýi tıis. Demek, endi Qazaqstan men Tájikstan saýda-sattyǵyn damytyp, kóliktik qarym-qatynasyn odan ári nyǵaıta túspek.

Esterińizge sala ketsek, 15 naýryzda Nursultan Nazarbaev pen Emomalı Rahmon Ortalyq Azıa elderi basshylarynyń Astanada ótetin jıynyna qatysady.