«Qazaq memleketine – 550 jyl» jyr múshaırasyna!

  Úmitterin jalǵaǵan kúnge aldaǵy, Keri tartqan kezeńde kembal baǵy. Eldik týyn kótergen eńse tiktep, Kósegeli dalamnyń Kókjaldary...   Arqasyna kóterip Azattyǵyn, Samarqaýlaý tórimde Ǵajap Tilim: Handyǵymdy jyrlasyn Orda tigip, Jer júzine pash etken Qazaqtyǵyn!   Dos kúmiljip tursa da dushpan tasyp, Jotasynan qadalǵan suqtan jasyp, Orta joldan qosylǵan alamanǵa, Bizdiń ǵumyr ketedi Myqtan da asyp...   Shańnan shyqty, jarq etip Qulagerim! Tynystaı shap, tym uzaq barar jeriń! Alashymnan týady túńilmegin, Astrahan, Azaýdy alar eriń.   Jer-sý úshin shyqty ǵoı talaı shyǵyn, Kún de týar ony da sanaıtuǵyn. Eles emes, ertegi, ańyz emes, Altyn Orda, Kók Orda, Saraıshyǵym.   Eldikpenen qymtaǵan jan-jaǵymdy, Yntymaqpen atyrǵan tań jaǵymdy. Halqym ult bop uıı ma, han kótermeı, Elim degen erlerin, handarymdy. Aqıqattan jalǵan sóz asa almaıdy, Astamdyqpen tarıh jasalmaıdy. Óz qaǵynan jerigen, jelikkenmen, Órge qaraı bir qadam basa almaıdy.   Qus kıesi Aqqý men Qazdy atqan, Aıamaǵan nadandy Ardy satqan. Bolmysymen qaınasqan bostandyǵy,– Arǵy Ǵuńnan, Kók Túrik, baǵzy Saqtan.   Handyǵym Haq bolǵanda, halqym kári, Qaımanadan kem be edi narqym nári. Arýlaǵan kıgizip altyn kebin, Sýsyndasa ishkizgen altyn dári.   Ótip jatyr almasyp, ómir-ólim, Teńiz, muhıt tolqysa tógiler kim? Óńmenimde qaptaǵan qara shybyn, Tý syrtymda jalmaǵan tóńiregin...   Erek týǵan Er búgin jasqana ma, Úlgi bolǵan ózine, basqaǵa da. Han Jánibek, Han Kereı qurǵan Orda, Aq Ordaǵa aınaldy Astanada.   Ashylmaǵan syry mol astarynda, Alataýdyń, Altaıdyń asqarynda. Alaýlaıdy Baıraǵy Máńgiliktiń, Altyn Kúnniń astynda Aspanymda!   Janashyrsyz zamanda «Ós!» deıtinsiz, Joǵalmaǵan kerýen – «Kósh!» deıtin Biz! Jazyp jatyr tórine Azıanyń, Tuıaǵymen tulpardyń Óshpeıtin İz! Baqytbek Bámishuly