Pavlodar oblysy ishki saıasat basqarmasynyń basshysy Baýyrjan Kapenov pen oblys tutynýshylar odaǵynyń teń tóraǵasy atanyp júrgen Iýrıı Pavlenkonyń is-áreketteri Ertistiń Kereký óńirindegi shyǵarmashyl qazaq zıalylary men qoǵam belsendileriniń narazylyǵyn týdyrdy. Baýyrjannyń qazaqshasy da, qazaqshylyǵy men saıası biliktiligi de shamaly. Pavlodar qalasy ishki saıasat bólimi basshysy bolyp turǵanynda telejýrnalıstiń Lenın kóshesin ataýyn aýystyrý jónindegi suraǵyna, «Tura bersin, kimge kedergi keltiredi!», - dep oryssha dúńk etip jaýap qaıtarǵany áli umytylǵan joq.

Iýrıı Pavlenko bolsa kezinde «Lad» uıymynyń ásire belsendisi retinde Ermak qalasy ataýyn qazaqshaǵa aýystyrýǵa, Keńes odaǵynyń batyry Mahmet Qaıyrbaevtyń esimin Týrgenov kóshesine berýge qatty qarsylyq kórsetken edi. Bertin QHKP belsendisi retinde oblysta komýnıstik ıdeologıany júrgizýge atsalysty. Osyndaı is-áreketterimen aty shyqqan Kapenov pen Pavlenko taban astynda «Nevada-Semeı» antıadrolyq qozǵalysyna - 25 jyl» medalynyń ıegerleri atandy!.. Sóıtip, qozǵalystyń naǵyz belsendileriniń eńbegin ıemdenip, Oljas Súleımenovtyń ózin aldap soqqanyna tıtteı qymsynǵan joq! Oblystyń ishki saıasat basqarmasynyń basshysy mundaı bolǵanda, keńestik kezeńdi kókseýshiler qandaı bolmaq?.. Olar negizinen BAQ salasynda, qoǵamdyq uıymdarda júr. Ýkraınanyń Reseımen shekaralas óńirindegi qazirgi jaǵdaı Qazaqstannyń Reseımen shekaralas bizdiń óńirde kúni erteń ornamasyna kim kepildik beredi? Bir biletinim, Kapenov pen Pavlenko kepildik bermeıdi! Osy oraıda oblys basshysy Qanat Bozymbaevqa baǵyttaǵan jarıa hatyma jaýap joq. Bálkim jergilikti shyǵarmashyl qazaq zıalylary men qoǵam belsendileriniń sózi oblys ákimine jetpeıtin shyǵar... Jetse aımaqtaǵy qıýy kete bastaǵan ıdeologıa salasyn túzetýge aımaq basshysy qandaı da bir shara qoldanar edi ǵoı... Solaı desek te, júregimiz qan jylap turyp: «Elimiz aman, jurtymyz tynysh, egemendigimiz baıandy bolsa eken» dep tileımiz. Bul tilegimizdiń Táńirge jetýi múmkin...

Arman Qanı