Tel-Avıv ýnıverstıtetiniń ǵalymdary klımattyń jahandyq ózgerýine boljam jasady, olardyń aıtýynsha, bul qubylystar jaz mezgiliniń uzarýyna ákelip soǵýy múmkin, dep jazady Sputnik Qazaqstan.

Izraıl ǵalymdarynyń derekterine súıensek, parnıktik gazdar – klımattyń ózgerýine ákep soǵatyn negizgi faktor, ol adamnyń is-áreketimen tyǵyz baılanysty. Sarapshylar zertteýlerin Halyqaralyq klımatologıa jýrnalyna jarıalap, dabyl qaǵatyn qorytyndylar jasady: adamnyń is-áreketi osyndaı qarqynmen klımatqa áser etetin bolsa, ǵasyrdyń ortasyna qaraı jaz mezgili tórtten bir bólikke, al ǵasyrdyń sońynda eki aıǵa deıin uzarady.

Izraıl, Mysyr, Lıvan jáne Túrkıa sıaqty elderde qurǵaq ári aptap kezeń jarty jylǵa deıin sozylyp, al jańbyrly maýsym eki aıǵa deıin qysqarady. Bul ózgerister óńirdiń tirshiligine aıtarlyqtaı yqpalyn tıgizýi múmkin: sý resýrstarynyń sapasy tómendep, maýsymdyq aýrýlardyń merzimi men jıiligi ózgerýi yqtımal. Klımattyń aýysýyna daıyndalǵan jón, dep sanaıdy ǵalymdar, sebebi jylynýdyń aldyn alý múmkin emes kórinedi.