Aýa temperatýrasynyń joǵarylaýy sebebinen TJ jarıalaný qaýpi bolǵandyqtan, Shyǵys Qazaqstannyń Shemonaıha jáne Katonqaraǵaı aýdandarynda da jergilikti mańyzdaǵy tótenshe jaǵdaı jarıalanýy múmkin, dep habarlaıdy Qamshy.kz aqparat agenttigi.
Oblystyq tótenshe jaǵdaılar departamentiniń habarlaýynsha, eki aýdanda da «joǵary daıyndyq» rejimi jarıalanǵan. Iaǵnı, barlyq azamattyq qorǵanys qurylymdary tasqyn qaýpi seıilgenshe kúsheıtilgen rejimde jumys isteıtin bolady. Katonqaraǵaı aýdanynda 10 úı men 35 aýlaǵa sý jaıylǵan.
Sý basqan úılerden 44 adam qaýipsiz jerge kóshirilip, týysqandary men jataqhanaǵa ornalastyryldy. Apat ornynda jergilikti atqarýshy organdardyń 58 qyzmetkeri men №36 órt sóndirý bóliminiń 18 sarbazy jumys isteýde. Olar úılerge aqqan sýdyń jolyn qumqappen bógeýde.
Qazirgi ýaqytta sý basqan ýchaskelerdiń jaǵdaıyn baqylaıtyn jumys toby da qurylǵan. «Shemonaıha aýdanynyń Verh-Ýba aýylynda da qarǵyn sýmen kúres júrip jatyr. Munda 68 úıdiń aýlasyna sý kirip, 1 eresek adam men 3 bala aýyl mektebine ornalastyryldy. Jergilikti atqarýshy organ ókilderi men órt sóndirýshiler aýlalarǵa jaıylǵan sýdy sorǵytýda» - delingen tótenshe jaǵdaılar departamenti habarlamasynda.
Eske salsaq, oblystaǵy Glýbokoe aýdanynda tabıǵı sıpattaǵy tótenshe jaǵdaı jarıalanǵan bolatyn.
