Taldyqorǵannan shyqqan tanymal ánshi Álisher Qaıratuly óziniń týǵan jerinde «Rýhanı jańǵyrý» atty jańa ániniń tusaýyn kesti. Óner ıesiniń shyǵarmashylyǵyn qoldaýǵa oqýshylar men stýdentter jáne qala ákiminiń orynbasary Marlen Kólbaev arnaıy keldi.
Sharaǵa, sonymen qatar, kásipker Qaırat Mataev, qala jastary men turǵyndar qatysty.
Kezdesý barysynda Álisherdiń ákesi Qaırat sóz alyp beınebaıannyń túsirilýi men óz kásibin sóz etti.
«Qazaqstan Respýblıkasy Prezıdentiniń halyqqa joldaýyndaǵy mańyzdynyń biri ol - aýyl sharýashylyǵy salasy.Osyǵan oraı qazirgi ýaqytta aýyl sharýashylyǵynyń damýyna barlyq jaǵdaılar jasalǵan. Sonyń arqasynda biz óz kásibimizdi keńeıtip, dóńgeletip otyrmyz. Al Álisherdiń beınebaıany Otanymyzǵa rýhanı azyq beredi dep oılaımyn», - dedi ol óz sózinde.
Jınalǵan jurtshylyq ánshige qutty bolsyn aıtyp, óner áleminde shyǵar shyńdaryń kóp bolsyn dep tilekterin aqtardy. Atalmysh sharanyń shymyldyǵy ánshiniń jańa ánimen túrildi. Qonaqtar óner ıesine qoldaý kórsetip, ózderiniń ystyq yqylasyn bildirdi.
Aıtalyq, qazirgi zamanda ánshiniń kásibı sheberligin bylaı qoıǵanda, bir án shyǵarýdyń ózi úlken qarjy men mol eńbekti talap etedi. Osy oraıda, jańa týyndynyń jaryq kórýine kásipker Qaırat Mataev sebepker bolǵan. Ánniń tusaýkeser rásiminde alǵashqy sóz demeýshilik tanytqan azamatqa berildi.
«Elbasynyń «Bolashaqqa baǵdar: rýhanı jańǵyrý» maqalasyn jastar arasynda nasıhattap, olardyń qyzyǵýshylyǵyn arttyrý maqsatynda osy ándi jaryqqa shyǵaryp, beınebaıan túsirdik. Elimizdiń ulttyq salt-dástúrin, rýhanı qazynasyn nasıhattaýǵa baǵyttalǵan osyndaı sharalar kóp bolsyn. Jastardy rýhanı mádenıetimizdi damytýǵa shaqyramyn», — dedi Qaırat Mataev.
Kelesi kezekte sóz tizginin qala ákiminiń orynbasary Marlen Kólbaev aldy. Ol jas óner ıesine jáne «Rýhanı jańǵyrý» ániniń shyǵýyna kómek kórsetken kásipkerge rızashylyǵyn bildirdi. Jańa týyndynyń budan da úlken sahnalarda shyrqalýyna tilektes ekenin aıtyp, qoldaıtyndyǵyn jetkizdi.
Al Álisher Qaıratuly bolsa, óz kezeginde «Rýhanı jańǵyrý» atty beınebaıanyn jandy daýysta oryndap, kórermen qoshemetine bólendi.
«Biz búginde kúndelikti tirliktiń qamymen júremiz dep, ózimizdiń rýhanı jan dúnıemizdi álsiretip alǵan sıaqtymyz. Aıtpaǵym, júregi elim dep soqqan árbir azamat óziniń otanyna, ótken tarıhyna qurmetpen qaraýy tıis. Artynan erip kele jatqan óskeleń urpaqqa ulttyq qundylyqtarymyzdy nasıhattaýy kerek dep oılaımyn. Biz jastardyń rýhyn oıatyp, otansúıgishtikke tárbıeleý maqsatynda osy ándi jaryqqa shyǵardyq. Halyq jyly qabyldaıdy degen úmittemin», — deıdi qazaq estradasynyń jas ánshisi Álisher Qaıratuly.
Aıta keteıik, jańa ánniń áýenin elimizge tanymal sazger Arman Dúısenov daıyndasa, sózin belgili aıtysker aqyn Rınat Zaıytov jazyp shyqqan.
Shara sońynda qonaqtar beınebaıannyń mazmuny men kórkemdik jaǵy úılesim taýyp, kóńilden shyqqanyn atap, alǵystaryn bildirip tarqasty.
