Kórkemóner galereıasynda  sýretshi Shattyq Batannyń “Boıaýlar kúmbiri” atty jeke shyǵarmashylyq kórmesi ótti. Onda beıneleý ónerinde ózindik qoltańbasy bar daryn ıesiniń 30-dan astam týyndysy qoıyldy.

Uıymdastyrýshylar kórmeni ótkizýdegi maqsat — egemendi elimizdiń ulttyq mádenı murasyn, salt – dástúr, rýhanı baılyǵymyzdy, qol jetkizgen tolymdy tabystarymyz ben  jetken jetistikterimizdi keńinen nasıhattaý deıdi.  Sýretshi shyǵarmalarynyń negizgi ózegi – tańǵajaıyp tabıǵattyń sulýlyǵy, qarapaıym aýyl adamdarynyń kúndelikti tynys-tirshiligi. Osylaısha qylqalam sheberi ómirdiń san alýan qubylystaryn qaz-qalpynda beıneleıdi. QR Sýretshiler Odaǵynyń múshesi Sh. Batan “Biz sýret ónerin ulttyq deńgeıde baǵalaýǵa umtylýymyz kerek. Alysqa barmaı-aq ózimizdiń sýretshilerimizdiń kompozısıalarynan nár alyp, naǵyz ónerdi tanýǵa talpynaıyq. Biz olardy qanshalyqty kókke kótere alsaq, tól mádenıetimiz de sonshalyqty bıik bolady. Bir kartınany saldyń delik.  Ol jaı ǵana oryndaýshylyq. Biraq, týyndyǵa jan bitirý úshin onda seniń shyǵarmashylyq sheshimiń, boıaýyń, túsiń bolýy shart. Ózińniń kóńil kúıińdi sol kartınaǵa bere alsań ǵana ol jandanyp, naǵyz óner týyndysyna aınalady. Kartınalarymda ulttyq boıaýlarǵa, qanymyzǵa tán qanyq tústerge basymdyq beremin. Ár shyǵarmam janymnyń bir bólshegi sıaqty. Naǵyz ónerdi saýdaǵa salýǵa bolmaıdy. Ol sol dáýirdiń tynysyn bolashaqqa jetkizýshi. Sýretpen tynystaımyn, sýretpen ómir súremin. Eń negizgi maqsatym — óner aldyndaǵy tazalyqty saqtaý. Kıeli ónerdiń qadirin ketirmeý, tunyǵyn laılamaý” – deıdi.