Aǵymdaǵy  jyldyń 22 aqpanynda Transparensı Interneshnl uıymy ótken  jylǵy Sybaılas jemqorlyqty túısiný ındeksi qorytyndysyn jarıalaǵan bolatyn. Onda Qazaqstan 31 upaımen 180 eldiń ishinde 122 orynǵa taban tirep, burynǵy jyldarmen salystyrǵanda biraz jaqsara bastaǵanyn ańǵartqan. Osyǵan baılanysty, Taldyqorǵanda Óńirlik komýnıkasıalar qyzmetiniń uıymdastyrýymen «Arnaıy monıtorıńteý tobynyń jumysy jáne Qazaqstannyń Transparensı  Interneshnl reıtıńindegi baǵalanýy» taqyrybynda baspasóz-máslıhaty ótti.

Aımaqtaǵy qoǵam belsendileri men BAQ ókilderi qatysqan basqosýda QR Memlekettik qyzmet isteri jáne sybaılas jemqorlyqqa qarsy is-qımyl Agenttiginiń Almaty oblysy boıynsha departamenti basshysynyń orynbasary Danıar Sabyrbaev bul baǵytta atqarylyp jatqan jumystar jaıyn keńinen túsindirip shyqty. Sondaı-aq ol: «Almaty oblysynyń Arnaıy monıtorıńteý tobynyń ishine «Nur Otan» partıasynyń, qoǵamdyq uıymdardyń, bilim salasy, Azamattyq Aláns, bıznes ókilderi jáne oblys ákimdiginiń jáne Departament qyzmetkerleri kirdi. Atalǵan toptyń negizgi maqsaty – QR sybaılas jemqorlyqqa qarsy 2015-2025 jyldarǵa arnalǵan strategıasynyń atqarýynyń baqylaý jáne oǵan syrtqy taldaý júrgizý. Top  músheleri qoǵamdyq baqylaý aıasynda Almaty oblysy qurylys obektileriniń sapasyn monıtorıńteý jumystaryn atqardy. Máselen, ótken jyly Arnaıy monıtorıńteý tobynyń 4 otyrysy ótip,  sonyń nátıjesinde Almaty oblysynyń jergilikti atqarýshy organdaryna jáne ortalyq memlekettik organdaryna 24 usynys berilgen. Búginde bul toptyń 2018 jylǵa arnalǵan jańa joba-josparlary daıyndalǵan» – dedi. Osydan soń Arnaıy monıtorıńteý tobynyń músheleri jeke-jeke sóz alyp, ortaq oı bólisti.