Almaty oblysy İle aýdanynyń ákimdigi 28,8 mln teńgege Belarýsten mektep partalaryna aldyrtýǵa nıetti ekenin aıtty, dep jazady Qamshy.kz aqparat agenttigi. Bul týraly Taldyqorǵanda ótken Otandyq taýar óndirýshilerge qoldaý kórsetý sheńberinde satyp alý salasyndaǵy jumys komısıasynyń kezekti otyrysynda málim boldy.
Komısıa hatshysy, Almaty oblysy Kásipkerler palatasy dırektorynyń quqyqtyq máseleleri boıynsha orynbasary Qanat Qabdıevtiń aıtýynsha, 2017 jyldyń tamyzynda İle aýdanynyń bilim bólimi «Temır Grand» JSHS-men mektep partalaryn jetkizý boıynsha kelisim-shartqa qol qoıǵan.
Aıta ketsek, alǵashynda ákimdik 19,7 mln teńgege 1376 dana taýarǵa tapsyrys bergen, komısıanyń kezekti otrysynda bul kórsetkishtiń sanyn arttyrýǵa sheshim qabyldandy.
«İshinara júrgizilgen saraptama boıynsha, tehnıkalyq sıpattamasy men sharttar boıynsha taýardy jetkizý merzimi kelisimge qol qoıylǵan kúnnen bastap 20 kún retinde anyqtalǵan. Iaǵnı, 2017 jyldyń 12 qyrkúıeginen keshiktirmeı qol qoıylý kerek. Alaıda 26 qyrkúıek kúni qosymsha kelisim daıyndalyp, kelisim-sharttyń jalpy somasy 28 863 296 teńgege deıin artqan. JSHS taýardy Belarýs Respýblıkasyn jetkizgen. Qazaqstannyń Jıhaz óndirýshileri jáne aǵash óńdeý ónerkásibi qaýymdastyǵynyń málimetinshe elimizde jıhaz shyǵaratyn 50 shaqty kásiporyn bar eken», - dedi Qanat Qabdıev.
Qanat Qabdıev 20 kún retinde bekitilgen tapsyrysty jetkizý merzimine nazar aýdarý qajettigin aıtty.
«Jıhaz shyǵarýmen aınalysatyn jergilikti kásipkerler bul ýaqyt ishinde osynshama kólemdegi mektep partasyn jetkizý múmkin emestigin aıtady», - dedi Qanat Qabdıev.
İle aýdany ákimdiginiń ókili tarapynan jıynǵa qatyspaý sebebinen atalmysh derek boıynsha esh túsinikteme berilmedi.
Jalpy memlekettik satyp alý veb-portalyndaǵy málimet boıynsha 2017 jyly İle aýdanyndaǵy búdjettik baǵdarlamalardyń 30 ákimshisi 13,339 mlrd teńgege 1164 kelisim-shart jasaǵan.
Otyrys barysynda Qarasaı aýdany jáne densaýlyq saqtaý basqarmasynyń kásipkerlerdi satyp alý salasynda qoldaý máseleleri boıynsha atqarǵan jumys qorytyndylary tyńdaldy. Aıta keteıik, Qarasaı aýdany oblys boıynsha satyp alýdaǵy jergilikti quram úlesi boıynsha 74%-ti kórsetip, joǵary kórsetkishke ıe bolǵan. Ákimdiktegiler atalmysh kórsetkishti jaqsartý boıynsha sharalar jalǵasatynyn aıtty. Jalpy aýdanda 2018 jylǵa satyp alý júrgizý úshin 4,8 mlrd teńge bólingen.
Densaýlyq saqtaý basqarmasynyń aqparatynsha, 2017 jyly memlekettik satyp alý segiz nysan boıynsha 1,2 mlrd teńgeden astam somaǵa ótkizilgen. Otandyq óndirýshilerdi qoldaý aıasynda jeti kásiporynmen 120-dan astam dárilik zattar men medısınalyq maqsattaǵy ónimder boıynsha jeti uzaqmerzimdi kelisim-shart jasalǵan. Olardyń qatarynda «Aksel ı A» JSHS, «Dolche» JSHS, «Almerek» JSHS, «Abdı Ibrahım Global Farm» JSHS, «Eleas» JSHS, «Nobel» JSHS, «Kelýn-Kazfarm» JSHS.
Sonymen birge ákimdikter men oblystyq basqarmalarǵa ótkiziletin memlekettik satyp alý jónindegi aqparatty ınternet-resýrstarǵa jarıalaý jáne satyp alý ákimshilerine usynys retinde joldanatyn otandyq taýar óndirýshiler reestrin ázirleý men ony ákimdik saıttaryn ornalastyrý jóninde usynystar berildi.
Aıta keteıik, Otandyq taýar óndirýshilerge qoldaý kórsetý sheńberinde satyp alý salasyndaǵy jumys komısıasynyń otyrystaryn Taldyqorǵan qalasynda apta saıyn ótkizip, onda ákimdikter men salalyq basqarmalardyń satyp alý salasy boıynsha jumystardy tyńdaý josparlanǵan. Ótken otyrysta Taldyqorǵan qalasy jáne Qaratal aýdanynyń ákimdikteriniń, oblystyq qurylys basqarmasynyń esepteri tyńdalǵan bolatyn.
