Kásipqoı boksta baq synap júrgen otandasymyz Qanat Islam «WBA International» belbeýi úshin jekpe-jek ótkizbeıtin boldy. 1 naýryz kúni Máskeýde ótýi tıis bolǵan kezdesý qarjy máselesine baılanysty óz sheshimin tappaı qaldy.
Qanat Islam iri ataq úshin argentınalyq Gýıdo Nıkolas Pıttomen judyryq túıistirýi tıis bolatyn. Kezdesý 12 raýndqa josparlanyp, orta salmaqta «WBA International» ataǵy sarapqa salynady dep kútilgen edi. Biraq Qanat Islamnyń proýmoýteri Nelson Lopes qajetti qarjyny taba almaǵan. Sondaı-aq Máskeýde Janqosh Turarov pen venesýelalyq Franklın Varela arasyndaǵy kezdesý de qarjy máselesine baılanysty ótpeıtin boldy.
Bıyl 30 jastaǵy Qanat Islam men 24 jastaǵy Jańqosh Turarov kásipqoı boks rınginde tórt jekpe-jekten ótkizýdi josparlap otyr eken. Ekeýiniń chempıondyq ataq pen belbeý úshin ótkizetin jekpe-jekterin myńdaǵan jankúıerler taǵatsyz kútýde. Endigi kezdesýleri naýryz aıynyń sońyna qaraı ótýi múmkin. Esterińizge sala keteıik, eki boksshymyz da – Latyn Amerıkasy men Karıb baseıni elderiniń qurlyqtyq chempıondyq belbeýleriniń ıegerleri.
