İshki ister mınıstri Qalmuhanbet Qasymov eki qazaqstandyq basylymnyń relaksıasynda júrgizilgen tintýdi túsindirdi, dep habarlaıdy Qamshy.kz aqparat agenttigi Sputnik Qazaqstan saıtyna silteme jasap. 

«30 naýryz kúni Astana qalasy İİD-ǵa QR azamaty Kákimjanovtan aryz tústi. Ol ratel.kz portaly men Forbes Qazaqstan jýrnalynda jalǵan aqparat taraýyna baılanysty sharalar qabyldaýdy suraǵan. Atalǵan aryz sotqa deıingi tergeýlerdiń biryńǵaı tizimine engizildi. QR QK 274-baby 3-tarmaǵy boıynsha tergeý bastaldy», — dedi ol.

Mınıstr munyń aldyna 2017 jyly uzaq sot talqylaýlary bolyp ótkenin atap ótti. 

«Medeý aýdandyq soty ózi qaraǵan materıaldar negizinde jáne sot tapsyrmasymen júrgizilgen sot psıho-fızıologıalyq saraptama negizinde aryzdanýshy kórsetken barlyq málimet shyndyqqa janaspaıtyny jáne onyń ar-namysyna kir keltiredi degen sheshim qabyldady. Osyǵan baılanysty tergeý bastaldy, sottan úıde jáne jumys ornynda tintý júrgizý týraly sanksıa alyndy. Sondyqtan tergeý organdary osy is-sharalardy júrgizip jatyr. Tergeý nátıjesi boıynsha barlyq aqparatty keıinirek habarlaımyz», — dedi Qasymov.

Ol quqyq qorǵaý organdary buryn jýrnalıser paıdalanǵan barlyq tehnıkany tárkilegenin aıtty.

Aıta ketsek, keshe polısıa qyzmetkerleri Ratel.kz portaly men Forbes Kazakhstan jýrnalynyń redaksıalarynda tintý júrgizip jatqany belgili boldy. Jýrnalıs Vadım Boreıkonyń aqparatynsha, Ratel.kz redaksıasynda  qujattar men kompúterler tárkilengen.

Sonymen qatar, portaldyń bas redaktory Marat Asıpov, orynbasary Sapa Mekebaev jáne sholýshy Anna Kalashnıkova ustalǵany málim boldy. Forbes Kazakhstan redaksıasynda bas redaktordyń orynbasary Aleksandr Vorotılov ustaldy. Polısıa ázirge bolǵan oqıǵaǵa qatysty túsinikteme bergen joq.