Keshe Prezıdent jarlyǵymen Darhan Káletaev Din isteri jáne azamattyq qoǵam mınıstri bolyp taǵaıyndaldy. Budan buryn Prezıdent Ákimshiligi basshysynyń orynbasary, «Nur Otan» partıasy tóraǵasynyń birinshi orynbasary, «Samuryq-Qazyna» ulttyq ál-aýqat qorynyń basqarýshy dırektory qyzmetterin atqarǵan. Buǵan deıin Prezıdentiniń jarlyǵymen Parlament Senatynyń depýtaty bolyp taǵaıyndalǵan bolatyn.
Darhan Káletaev – ishki saıasatta óte tájirıbeli tulǵalardyń biri. Ol jastar saıasatyn ózgertýge bastamashy bolǵandardyń biri sanalady. Burynǵy Mádenıet jáne qoǵamdyq kelisim mınıstrligi jastar saıasaty departamentiniń dırektory bolǵan kezinde-aq Darhan Amanuly «Memlekettik jastar saıasaty týraly» zań jobasyn daıyndaýǵa úlken úlesin qosqan bolatyn. Onyń qatysýymen elimizde birqatar jastar uıymy paıda bolyp, belsendi jastarǵa óz múmkindikterin kórsetýge jaǵdaı jasaldy. Sonymen qatar ol saıası partıalarmen, memlekettik emes uıymdarmen, túrli birlestiktermen ózara dıalog ornatýǵa uıytqy bola bildi. Prezıdent tańdaýynyń Darhan Káletaevqa túsýi onyń saıası kommýnıkatıvtiginen bolsa kerek. Káletaev árqashan ishki saıasattaǵy kommýnıkator statýsyn saqtaı biledi, «Samuryq-Qazyna» sıaqty ekonomıka máselesimen aınalysatyn qurylymda menedjerlik jumysymen qatar áleýmettik kommýnıkator rólin atqara bildi. Káletaevtyń zań shyǵarýshy bılikten atqarýshy bılikke ótýi Senatty álsiretti deýge de bolatyn shyǵar, sebebi ol depýtat bolyp turǵan kezinde ózin ádetinshe óte ashyq ustap, gazet betterinde, «Qazaqstan» arnasynda bolatyn «1-shi Stýdıa» sıaqty saıası tok-shoýlarda oppozıasıa ókilderimen ashyq pikir almasyp, qyzyqty oılarymen kórinetin. Mysaly «jer daýy» kezinde «1-shi Stýdıa» saıası-tok shoýynda Káletaevtyń: «Qazaq ulty jerdi ekonomıkalyq kategorıa dep emes, rýhanı qundylyq retinde túsinedi», - degen sózi qoǵam belsendileriniń kóńilinen shyqqan bolatyn.
Jalpy qazirgi kezde eki tilde óz oıyn erkin jetkize alatyn depýtattar men mınıstirler neken-saıaq, Darhan Amanuly eki bılik ortasynda júrip kommýnıkatıvtik qasıetterin odan ári damytyp, eldegi jaǵdaıdy odan beter tereń túsine bastady, al bul tájirıbe jańa qyzmette óte paıdaly bolmaq. Óıtkeni Káletaevtyń mınıstr retinde memleket pen din arasyndaǵy qatynasty retteýdegi alǵashqy qadamy din týraly jańa zań jobasynyń parlament qabyrǵasyna ótýinde bolmaq.
Nurǵalı Nurtaı
