«Jas Otan» Jastar qanatynyń IV Seziniń birinshi kúni ótken «Rýhanı jańǵyrý» sesıasy jalǵasady. Esterińizge salamyz, 28-29 naýryz kúnderi Astana qalasynda «Nur Otan» partıasy «Jas Otan» Jastar qanatynyń kezekti IV Sezi ótti. «Jańa álemge jol salamyz» degen uranmen ótken Sezge elimizdiń ár óńirinen kelgen 600 delegat jáne 900-den astam qonaq qatysty. İs-sharanyń alǵashqy kúni «Jas Otan conf» degen ataýmen konferensıa formatynda uıymdastyryldy. Onda qatysýshylar ǵylym, bilim, ınovasıa, kásipkerlikti damytý, sıfrlandyrý jáne salaýatty ult qalyptastyrý isine qatysty ózekti máseleler men Elbasynyń «Bolashaqqa baǵdar: rýhanı jańǵyrý» baǵdarlamalyq maqalasyndaǵy basym baǵyttardy júzege asyrý barysyn keńinen talqylady. Sesıa aıasynda jasotandyqtar qazirgi jaǵdaıdy zerdelep, kúrmeýi qıyn máselelerdiń mánine nazar aýdaryp, olardy sheshý joldaryn usyndy.
Búgin QR Ulttyq mýzeıinde jastardyń jazýshy, qoǵam qaıratkeri Myrzageldi Kemelmen kezdesýi «Rýhanı jańǵyrý» sesıasynyń jalǵasy retinde ótti. Ol rýhanıat salasynda 10 kitap shyǵarǵan. Olardyń ishinde izgilikke, ımandylyqqa, bilim-bilikke, aqyl-parasatqa úndeıtin tanymdyq-kósemsózdik eńbekterine qosa, «Abzaldyq álippesi», «Ózime sabaq» sıaqty kitaptary oqyrman qaýymnan joǵary baǵaǵa ıe bolǵan.
Myrzageldi Kemel, jazýshy, qoǵam qaıratkeri jastarǵa aıtqan sózinde:
«Elbasynyń «Rýhanı jańǵyrý» baǵdarlamalyq maqalasynyń shyqqanyna 1 jyl boldy. Rýhanı jańǵyrý – bzdiń ózgerýmiz, sanamyzdyń ózgerýi, mádenıetimizdiń artýy, ómirge, jańa zamanǵa beıimdelýimiz, pragmatıkalyq kózqarastyń paıda bolýy. Jastarǵa berer keńesim – kitap oqý. Qazir ınternettiń damýymen kitaptyń túr-túrin tabýǵa bolady. Keregin tańdap oqý kerek. Internetti meńgerińder, sebebi, aldaǵy 20 jylda bilimsiz jastarǵa jumys bolmaıdy. «Jas Otannyń» bastamasy – jastarmen kezdesip, óz oıymmen bólisýge, aqyl-keńesimdi berýge arnalǵan paıdaly alań».
Kezdesýge Sıez spıkerleriniń biri jas arheolog, qazaqstandyq oqý oryndarynda alǵash PhD dárejesin alǵan ǵalymdardyń biri Aıbar Qasenalın, QR Ulttyq Mýzeıiniń ǵylymı qyzmetkerleri jáne elordalyq joǵary oqý oryndarynyń stýdentteri qatysty. Sondaı-aq, kezdesý qonaqtary úshin Qazaqstan tarıhy men qazaq ultynyń mádenı-tarıhı qundylyqtaryn kórsetetin arnaıy ekskýrsıa uıymdastyryldy. Sebebi, óz eliniń baı tarıhy men mádenıetin jetik bilgen adam ǵana, bolashaqqa nyq senimmen qadam basyp, álemdegi sońǵy ózgeristerge ilese alady.
Aıbar Kasenalın, arheolog-ǵalym:
«Búgin jastar rýhanı azyq bolatyn tushshymdy áńgime ǵana tyńdaǵan joq. Kesh sońynda Qazaqstan Respýblıkasynyń Ulttyq mýzeıiniń tarıhı jádigerlerimen tanysyp, qazaq eliniń baı tarıhyna sapar shekti. Arheolog retinde óskeleń urpaqtyń óz eliniń tarıhy men mádenıetimen tanys bolýy óte mańyzdy dep esepteımin. Ótkenin bilmegen el, bolashaqqa nyq qadam basa almasy anyq. Barlyq jastardy mýzeıge shaqyramyn».
