QazUÝ-da «Rýhanı jańǵyrý» baǵdarlamasyn júzege asyrý sheńberinde «U 38» Ýnıversıtetter Alánsy ólketanýshy-etnograftar klýbynyń bastamasymen «Almaty qalasy jaıly 100 qyzyqty derek» atty biregeı joba bastaý aldy.
«U 38» Ýnıversıtetter Alánsy ólketanýshy-etnograftar klýbynyń jetekshisi, ál-Farabı atyndaǵy QazUÝ-dyń tarıh, arheologıa jáne etnologıa fakúltetiniń dekany Meńdigúl Noǵaıbaevanyń aıtýynsha, týǵan ólkeni zertteý salasyndaǵy mańyzdy áleýmettik tájirıbege jastardy tartý bul bastamanyń negizgi maqsaty. Ol óz sózinde: «Quramynda tarıhshy ǵalymdar – arheologıa, ólketaný jáne etnografıa salalarynyń mamandary bar bizdiń jobaǵa búginniń ózinde birneshe myń almatylyq oqýshylar men stýdentter tartylǵan», - dep atap ótti. «Jastar úshin bul «oqýlyq shekarasynan» shynaıy ómirge shyǵýǵa ári empırıkalyq jolmen, tarıhı-ólketaný jáne etnografıkalyq izdeýler arqyly tarıhqa ári qala mádenıetine «janasýǵa» múmkindik beredi. Mundaı úlgi jastardyń jasampaz tájirıbesin baıytady sonymen birge týǵan ólkeniń tarıhı murasyn qunttaýǵa ári qyzyǵýshylyqtaryn damytýǵa septigin tıgizedi».
«Almaty – bul myńjyldyq tarıhy bar qaıtalanbas qala. Bul jer arhıtektýranyń jáne mádenıettiń biregeı eskertkishterine toly jáne kóne ári qyzyqty jerler shoǵyrlanǵan. Qala sheteldik jáne otandyq saıahatshylardyń týrızm ortalyǵy bolyp tabylady ári mundaı joba Almatynyń jańa qyryn ashady», - deıdi Qazaq sport jáne týrızm akademıasynyń dosenti, ekskýrsovod O.G. Lúterovıch.
Qazaq memlekettik qyzdar pedagogıkalyq ýnıversıtetiniń dosenti Álıa Isaeva óz baıandamasynda stýdent-eriktiler tobynyń etnografıkalyq sıpattaǵy saýalnamany júrgizý jumystary týraly jáne olardyń Almatynyń arheologıalyq jáne tarıhı kartasyn jasaýǵa qatysýy jaıly aıtyp ótti.
M. Bazarbaev atyndaǵy №138 gımnazıanyń 11 synyp oqýshysy Dinmuhamed Álıasqarov Almaty qalasynda paıda bolǵan kóshe, ǵımarat ataýlarynyń tarıhy týraly jáne ataqty turǵyndar jaıly jańa maǵlumattarmen bólisti. Oqýshy aıtqandaı, mundaı zertteýler súıispenshilikti, qurmet sezimin, patrıottyqty oıatady ári jarqyn bolashaqqa degen senimdilikti nyǵaıtady.
Bastaý alǵan joba qatysýshylary qoǵamdy árdaıym zertteý barysymen tanystyryp otyrýdy josparlaýda. Jas ólketanýshylar ózderiniń áserlerimen jáne jańalyqtarymen áleýmettik jelilerde, sonyń ishinde ınteraktıvti rejımde jáne basylym betterinde bólisetin bolady
Joba qorytyndysy negizinde «Almaty qalasy jaıly 100 qyzyqty derek» jınaǵy jaryqqa shyqpaq, sonymen birge ońtústik astananyń jáne onyń mańaıyndaǵy arheologıalyq jáne tarıhı eskertkishterdiń kartasy jasalady.
