Elbasy Nursultan Nazarbaev bilim jáne ǵylym mınıstri Erlan Saǵadıevpen kezdesti, dep jazady Qamshy.kz aqparat agenttigi Aqordanyń baspasóz qyzmetine silteme jasap.

Kezdesý barysynda mınıstr Elbasyǵa 2016-2019 jylǵa arnalǵan bilim men ǵylymdy damytý jónindegi memlekettik baǵdarlamanyń júzege asyrylýy jóninde esep berdi.

Nursultan Nazarbaev elimizdegi saıası, ekonomıkalyq jáne áleýmettik reformalardyń júzege asyrýda oqý júıesiniń mańyzy zor ekenin atap ótti.

«Biz júzege asyrýǵa tıis barlyq baǵdarlamalyq qujattarda, sonyń ishinde bıylǵy «Qazaqstandaǵy tórtinshi ındýstrıaldyq revolúsıanyń jańa múmkindikteri» joldaýynda jáne «Rýhanı jańǵyrý», sonymen qatar, sıfrlandyrýdy damytýda bilim berý júıesi basty ról atqarady. Atalǵan barlyq bastamany sátti júzege asyrý úshin sapaly bilim qajet», - dep atap ótti Qazaqstan Prezıdenti.

Memleket basshysy elimizdiń bilim berý júıesinde júzege asyryp jatqan reformalardyń ýaqytyly ekenin basa aıtyp ótip, aǵylshyn tilinde jeke pánderdi oqytýǵa kóshý úrdisine bólek toqtalyp ótti.

«Aǵylshyn tilinde jeke pánderdi oqytý joǵarǵy synyptarda júrgiziletin bolady. Balalardy qazir aǵylshyn tiline úıretpesek, bolashaqta tolyqqandy kadrlar daıyndaı alamyz dep aıta almaımyn. Bul – ýaqyt talaby jáne ata-analar buǵan túsinistikpen qaraýy kerek. Alaıda balalardy qazaq tilinde oqytýdy da umytpaý kerek», - dedi Nursultan Nazarbaev.

Kezdesý barysynda Erlan Saǵadıev memlekettik jáne salalyq baǵdarlamalar sheńberinde mınıstrlikke júktelgen mindetterdiń qalaı oryndalyp jatqanyn habarlady.

Mınıstr mektepke deıingi bilim berý júıesin jetildirý jónindegi jumystardyń aralyq qorytyndylary týraly baıandady.

«2018 jyly balalardyń 95 paıyzy mektepke deıingi bilim berýmen qamtyldy. Bul negizinen jekemenshik balabaqshalardy salý arqyly júzege asyrylady. 2019 jyly erte damytý boıynsha biryńǵaı standarttar engiziletin bolady. Taǵy da aıta ketý kerek, búginde balalardy balabaqshaǵa kezekke turǵyzý úshin mobıldi qosymshany paıdalanýǵa bolady», - dep aıtyp ótti mınıstr.

Sonymen qatar Erlan Saǵadıev Nazarbaev zıatkerlik mektepteriniń tájirıbesine negizdelgen mektepterdi jańartylǵan mazmunǵa kóshirýdiń nátıjelerin tanystyrdy.

Mınıstr aǵylshyn tilinde jeke pánderdi oqytý boıynsha muǵalimderdi oqytýdyń jetistikterin tizip kórsetti.

«2016 jyly tek 2 myńǵa jýyq muǵalim ǵana aǵylshyn tilinde sabaq beretin. Byltyr tıisti kýrsqa qatysýǵa 11,5 myń adam ótinish bergen, onyń ishinde 3 myńdaı muǵalim kýrsty aıaqtap, aǵylshyn tilinde bilim bere bastady. 8 myńǵa jýyǵy óziniń oqýyn jalǵastyryp, qajetti deńgeıge ótip jatyr. 2019 jyly 13,5 myń mektep muǵalimi tórt pándi aǵylshyn tilinde úıretýdi bastaıdy», - dedi Erlan Saǵadıev.

Kezdesýdiń sońynda Elbasy mınıstrge birshama tapsyrma berdi.