Munaı baılyq emes —Mańǵystaý oblysynyń ákimi

/uploads/thumbnail/20180217105843555_small.jpg

Mańǵystaý oblysy munaı salasyndaǵy mamandyqtardy birtindep azaıtyp jatyr. Esesine eńbek naryǵyn ózgertý maqsatynda bıyl 10 jańa mamandyq engizgen. Bul týraly búgin aımaq basshysy Eraly Toǵjanov málimdedi, dep habarlaıdy Sputnik Qazaqstan tilshisi. 

Oblys ákimi halyqty munaıǵa degen quldyq sana-sezimnen arylýǵa shaqyrdy.

— Munaı baılyq emes, ol bar bolǵany shıkizat. Bizdiń baılyǵymyz – jerimiz ben halqymyz. Halqymyzdan asqan eshqandaı baılyq bolýy múmkin emes. Sondyqtan qazirgi tańda bizdiń oblysta jastardy shaǵyn jáne orta bızneske tartý, basqa da úlken baılyqtyń baryn jetkizý boıynsha úlken jumystar atqarylyp jatyr, — dedi ol. 

Toǵjanovtyń aıtýynsha, oblysta eńbek naryǵyn transformasıalaýǵa qatysty jumystar júrgizilýde.  Sonyń biri – munaı salasyndaǵy mamandyqtardy azaıtý. 

—  Ótken jyly oblysta 215 grant bólindi. Onyń ishinde 50 grantty biz arnaıy bóldik. Sebebi bizde qazir eńbek naryǵyn ózgertýge qatysty jumystar júrip jatyr. Atap aıtsaq, munaı salasyndaǵy mamandyqtardy birtindep azaıtyp jatyrmyz. Ol solaı bolýy da kerek, bizge basqa baǵyttardy damytý qajet. Bıyl jańa 10 mamandyq engizdik. Soǵan baılanysty men 50 grantty arnaıy bólip otyrmyn. Kelesi jyly 70 grant josparlap otyrmyz. Onyń ishinde tez qaıtarylymy bolý úshin 20 grantty magıstratýraǵa berip jatyrmyz, — dedi ákim.  

Búginde Mańǵystaý oblysy shaǵyn jáne orta bızneske erekshe den qoıyp otyr. "Qara altyn" óndirip júrgen munaıshylardyń deni de jeke kásipke kóship jatqan kórinedi.

—  Munaıdyń aınalasynda ómir boıy júrý mindet emes qoı. Orta jáne shaǵyn bıznes degen bolashaqta seniń balańa, keıin nemereńe de qalatyn eńbegińniń dúnıesi. Búginde kóptegen munaıshy sol jaqqa aýysyp jatyr. SHOB-ty damytý jaıdan-jaı týyp otyrǵan másele emes. Bul suraq Jańaózen qalasyna baılanysty týdy. Sebebi Jańaózenda jumyssyzdyq máselesi az emes. Búginde qalada 9 myń adam munaı salasynda isteıdi, al halyq sany 150 myń adam. Bir jyldyń ishinde 4 myń bala dúnıege keledi. Erteń ol balalardyń bárin biz qaıda jiberemiz? Sondyqtan orta jáne shaǵyn bızneske jaǵdaı jasaýymyz kerek. Erteńdi búgin oılamasaq, keıin bári kesh bolady", — dedi Toǵjanov.

Pikir qaldyrý

Qatysty Maqalalar