Pavlodarlyq til janashyry Rýza Beısenbaıtegi redaksıamyzǵa habarlasyp, ózine kúsh qoldanylǵanyn aıtty. Qoǵamdyq oryndarda qazaq tilinde qyzmet kórsetýdi suraǵan  turǵynǵa kúsh qoldanylsa da,  jergilikti polısıa qol ushyn sozbaǵan kórinedi. Búgin 13 jyl boıy qazaq tili úshin kúresip kele jatqan Rýza Beısenbaıtegi aksıaǵa shyqpaq.

— Búgin «Baqaýov, qazaq tilin qorlatpa!» degen uranmen aksıaǵa shyǵamyn. Sebebi polısıa eshteńe istemeı otyr. Osydan biraz ýaqyt buryn Jasqaırat Qaıyrov degen jergilikti polısıa basshysy «Biz barlyq polısıa qyzmetkerlerin shaqyryp barlyq turǵyn qazaq tilinde sóıleýge, qazaq tilinde jaýap alýǵa quqyly ekenin aıtamyz. Tilge baılanysty daý shyqsa, oqıǵa ornynan baryp sheshemiz», - dep aıtqan bolatyn.  Arada  bir apta ótse de,  eshqandaı nátıje bolǵan joq, - deıdi Rýza Beısenbaıtegi.

Til janashyrynyń aıtýynsha, jergilikti bılik pen jergilikti polısıa qurǵaq sózben jyly jaýyp qoıýǵa  úırengen. Pavlodar oblysynyń ákimi Bolat Baqaýovqa eki ret telefonogram jibergenin de aıtty.

— Baqaýovqa eki ret telefonogram tastadym. Ekeýi de qoǵamdyq kólikte aıaldamalardy, jol aqysyn tóleýdi qazaq tilinde aıtýdy suraǵanyma baılanysty.  Birinshisinde eger polısıa qyzmetkerleri kelmese, avtobýstyń astyna túsemin dep aıttym. Al ekinshisinde aksıa jasaǵaly jatqanymdy habarladym», - deıdi Rýza Beısenbaıtegi.  

Aıta ketsek, osydan aı buryn Rýza Beısenbaıtegi redaksıamyzǵa habarlasyp, avtobýs kondýktorynan jolaqysyn  qazaq tilinde suraýdy ótingen. Artynsha is nasyrǵa shaýyp, polısıa qyzmetkerleri kelmese, avtobýstyń astyna túsetinin aıtqan edi.

Rýza Beısenbaıteginiń aıtýynsha, onyń aksıaǵa shyqqannan basqa amaly qalmaǵan. Jergilikti polısıa oblysy ákimine baǵynyshty, onyń sózinen attap shyǵa almaıdy.

— Qolymda qazaq tilinde qyzmet kórsetýin suraǵanym úshin meni avtobýstan súırep shyǵarǵan, telefonymdy tartyp alǵan vıdeolar bar. Men sol vıdeolardy polısıaǵa kórsetkim keldi. Alaıda meni mazaq qylǵan adamsha úsh polısıa kóligi janymnan ótti. Mende onyń da vıdeosy bar. Bir saǵattan keıin aıaldamadan 100 metr jerge polısıa kóligi kelip toqtady. Baryp, mán-jaıdy aıtqanymda, «bizge eshqandaı tapsyrma berilgen joq, eshteńe isteı almaımyz», - dep aıtty, - deıdi Rýza Beısenbaıtegi.

— Men osylaı etpesem, biz osylaı etpesek qazaq tili qorlana beredi, - dep kúıinishpen aıaqtady sózin Rýza Beısenbaıtegi.