«Esquire» jýrnalyna suhbat bergen Erkin Tátishev aǵasynyń qazasy jaıly, ádildik pen shyndyq izdegen 14 jyl jaıly aıtyp beripti. Tipti, «Tátishevterge joǵarǵy jaq nusqaý berip otyr» degen alyp-qashpa áńgimege de jaýap bergen eken.

«Áıteýir, bizdikilerge joǵary jaq aıtyp, jol siltep berýi kerek sıaqty kórinedi de turady. Al bul jerde qylmys bary anyq. Uıymdasqan túrde kisi ólimi jasalǵan. Onyń quramynda iri-iri adamdar boldy. Ol adamdardyń jemqorlyq, urlyq sekildi basqa da qylmystary óz bastarynan jetip artylatyny taǵy ras», - depti Erkin Tátishev.

Erkinniń aıtýynsha, 2017 jyly Murathan Toqmadıdiń kúndeligi tabylǵan eken. Toqmadı sol jerde Erjan Tátishevtiń senimine qalaı kirýi kerektigi men aldaǵy josparlary jaıly jazǵan eken.

«Tergeýshilerdiń ózderi ań-tań boldy. Iá, qatyryp eshteńe jazbaǵan. Toqmadı Túrgenov emes qoı. Degenmen, naqty ýaqyty, ańǵa shyǵý, bankten nesıe alý t.s.s. josparlary jazylǵan», - deıdi marqumnyń inisi.

Erkinniń aıtýynsha, bultartpas dálelder keltirilgen soń da, Murathan Toqmadıge kinásin moıyndaýǵa týra kelgen. Tipti, shynaıy tergeý, tekseris Erjan Tátishevtiń qazasynan 6 jyldan keıin ǵana qolǵa alynypty.

«2008 jyly maǵyn ofıserler kelip: «Erkin, biz bul isti tergemekpiz. Bilemiz, bunyń artynda komıtettiń adamdary turýy múmkin» dedi. Men sol kezdiń ózinde-aq, istiń artynda Dútbaevtyń turǵanyn sezdim. Ol jeke bastyń sharýasy emes, oǵan Erjandy óltirý týraly tapsyrys túsken. Ol tipti 2002 jyly Erjandy óltirýge bekingen. Ol kezde Áblázov túrmede otyrǵan. Bul oǵan alıbı bolatyn edi», - deıdi.

Oǵan qosa, Erkin Tátishev Áblázov-Dútbaev jáne Jákishev úshtigi jaıly da aıtyp beripti.

«Dútbaev pen Jákishev jaqsy dos bolǵan. Sosyn Jákishev Dútbaev pen Áblázovtiń qarym-qatynas ornatýyna sebepshi boldy. Ol kezde Muhtar Qazatompromda qyzmette edi. Óziniń mansabyn da paıdalanǵan», - deıdi Tátishev.

Tátishevtiń týǵandary ne úshin osy kúnge deıin úndegen joq? Erkin Bas prokýratýra men UQK basshylyǵyna azyrdanyp, isti ashýyn talap etkeni jaıly aıtypty.

«Bul jerde másele Áblázov emes, Dútbaev jaıly. Ol Áblázovti qalqan qarýy tutty. Oǵan qansha ret kómektesti. Kúıeýbalalaryn jiberdi. Shynynda UQK burynǵy basshysyna is qozǵaý úshin adamǵa batyldyq kerek. 2016 jyly basshylqqa Kárim Másimov kelgennen keıin istiń aýany ózgere bastady. Másimov saıası erik-jigeri bar adam. Men qaıta shaǵymdandym. «Biz kóreıik. İsti qaraımyz» dep jaýap berdi Másimov. Ári qaraı, ýaqyt pen resýrstyń, tehnıkanyń, dálelderdi tabýdyń joly ǵana qalǵan.qudaıǵa shúkir, tapty. Al ne úshin óldirdi degenge kelsek, jaýaby qarapaıym. Ol barlyǵynan aıyrylǵan», - deıdi Erkin.

Aıtpaqshy, qaıtys bolǵan Erjan Tátishevke túrmege túser aldynda Áblázov BTA bankti aýdaryp berip, keıin qaıtaryp berýin suraǵan. Oǵan kónbegen Erjandy tapsyryp berip óltirtken degen boljam aıtylǵan edi. Erkin bul jaıly da óz pikirin aıtypty.

«Bul Muhtardyń ózi taratyp júrgen qaýeset. Ol saıası suqıt. Ol kez kelgen faktini alyp, ózine yńǵaılastyryp alady. Ol ótirik aıtýdyń sheberi. Ol Erjan jaıly ne demedi osy kúnge deıin», - depti.

Baýyrynyń qazasy bolǵan kún týraly Erkin bylaı deıdi:

«Erjandy moraldy túrde kúıdirý – tapsyrma boldy. Adam sharshaǵan kezde demalǵysy keledi ǵoı. Al meniń baýyrym ańshylyqty jaqsy kóretin. Al ol jaqta qaqpan daıyn turǵan. Tipti, Murathanǵa 2 mıllıon tólegen. Aqsha qaltada. Endi isti tyndyrý ǵana qalǵan», - deıdi Erkin Tátishev.

«Bul oqıǵa jeltoqsanda boldy. Al qyrkúıekte meniń ústimnen jasyryn is qozǵapty Dútbaev. Sóıtip, Erjandy óltirgen soń, meni buǵattamaq bolǵan ǵoı. Men muny túsindim. Qazir birdeńe desem, bitti, kúıip ketetin túrim bar. Sondyqtan, ýaqyt kelgenin kútip jattym. Bul júıeli túrde, egjeı-tegjeıli eseptelgen jumys. Bul týraly men de, meniń marqum baýyrym da bilgen joqpyz. Osynyń barlyǵynyń artynda Dútbaev turdy. Sondyqtan, biz erterek tergeýdi talap ete almadyq. Bul múmkin emes edi. Biz ádildik ornaýyn 14 jyl kúttik», - dep túıindeıdi Erkin Tátishev.