Almatydaǵy Áýezov aýdanynda iz-túzsiz joǵalǵan Malıka Oraqbaevany izdestirý jumystary jalǵasýda. Úsh kúnnen beri 14 jastaǵy mektep oqýshysynan habar joq, dep habarlaıdy Qamshy.kz aqparat agenttigi QazAqparatqa silteme jasap.
Almaty oblystyq İİD baspasóz qyzmetiniń málimetinshe, Malıka Oraqbaeva Almatydaǵy Tóle bı-Momyshuly kósheleri qıylysynan taksıge otyryp, Jambyl aýdanyndaǵy Qarǵaly aýylyna barmaq bolǵan.
«Oqıǵa 15 sáýir kúni bolǵan. Malıka Oraqbaevanyń anasy 16 sáýir kúni Jambyl aýdanynyń polıseıine kelip, qyzynyń joǵalǵandyǵy jóninde habarlady. Qazir oqýshyny izdestirý jumystary jalǵasýda. Qarǵalydaǵy mekteptiń muǵalimderi de polıseılermen birigip, jasóspirimdi izdestirip jatyr. Qyz bala Almatyda joǵalǵandyqtan, izdestirý jumystary Jambyl aýdanynda jáne Almaty qalasynda da jalǵasýda», dep málim etti Almaty oblystyq İİD baspasóz qyzmeti.
Aıta ketý kerek, 9-synyp oqýshysy Jambyl aýdanyndaǵy Qarǵaly aýylyndaǵy mektepte oqyǵan. Jetkinshek ata-ájesiniń tárbıesinde bolǵan.
