18 sáýirde QR Din isteri jáne azamattyq qoǵam vıse-mınıstri Berik Arynnyń tóraǵalyǵymen Dinı birlestiktermen baılanys jónindegi Keńestiń otyrysy ótkizildi.
Otyrysqa dinı birlestikterdiń, Qazaqstan halqy Assambleıasynyń, memlekettik organdar men úkimettik emes uıymdardyń ókilderi, sonymen qatar dintanýshy-ǵalymdar, qoǵam qaıratkerleri qatysty.
Kún tártibine sáıkes ınternet keńistiginde dinı ekstremızm men radıkalızm ıdeıalarynyń taralýyna qarsy is-qımyl, sondaı-aq Qazaqstan Respýblıkasy Din isteri jáne azamattyq qoǵam mınıstrliginiń, Astana jáne Almaty qalalary men oblystardyń ákimdikteri janyndaǵy dinı birlestiktermen baılanys jónindegi keńesterdiń rólin kúsheıtý jóninde usynystar ázirleý máseleleri qaraldy.
Keńes jumysyn ashqan vıse-mınıstr B. Aryn ekstremızm men terorızmge qarsy alǵysharttardy anyqtaý jáne joıý úshin zańnamalyq júıeni, uıymdastyrýshylyq bazany qurý jáne jetildirý úshin aıtarlyqtaı jumystar atqarylǵanyn atap ótti. Sonymen qosa vıse-mınıstr ınternettegi radıkaldy ıdeıalardy nasıhattaýǵa qarsy turý qajettiligine nazar aýdardy.
Atalǵan máseleler boıynsha sarapshylar da óz oılaryn ortaǵa saldy. Mádenıetter men dinderdiń halyqaralyq ortalyǵynyń dırektory Aıdar Ábýov ınternet-resýrstarda ornalastyrylǵan dinı materıaldardyń mazmunyna baılanysty zańnama talaptaryn buzýdyń aldyn alý boıynsha jumystar júrgizilip jatqanyn atap ótti. Onyń aıtýynsha, 2017 jyly Mınıstrlik 10744 ınternet-resýrstyń mazmunyna taldaý júrgizip, onyń ishinde zańnamalarǵa qaıshy keletin materıaldardy qamtıtyn 3555 ınternet-resýrstary anyqtalǵan.
Din isteri komıteti tóraǵasynyń orynbasary Balǵabek Myrzaev óz baıandamasynda ortalyq jáne aımaqtyq deńgeıdegi dinı birlestiktermen baılanys jónindegi Keńesterdiń rólin nyǵaıtý jóninde naqty usynystaryn aıtty. Onyń ishinde keńestiń tek dinı ǵana emes, sonymen qatar áleýmettik máselelerdi sheshýge qatysýy, kóshpeli otyrystardy ótkizý, Keńestiń sybaılas jemqorlyqqa qarsy áreket etý múmkindikterin paıdalaný máseleleri qarastyrylady.
Otyrysqa qatysýshylar ǵalamtor keńistiginde dinı ekstremızm men radıkalızm ıdeıalarynyń taralýynyń aldyn alý maqsatynda memlekettik organdardyń, azamattyq qoǵam men buqaralyq aqparat quraldarynyń birlesken kúsh-jigerin biriktirý mańyzdy ekenin atap ótti. Sonymen qatar, Keńes músheleri dinı birlestiktermen baılanys jónindegi keńesterdiń rólin kúsheıtý, sondaı-aq konsýltatıvti-keńesshi organnyń deńgeıin kóterý jóninde usynystar jasady.
