Búgin Ońtústik Qazaqstan oblysynda kámelet jasyna tolmaǵan eki ulynyń kózinshe áıelin baýyzdap óltirgen turǵynǵa qatysty sot úkimi  shyqty. Oblystyq qylmystyq ister jónindegi mamandandyryǵan aýdanaralyq soty Túrkistan qalasynyń 35 jastaǵy turǵynyn 15 jylǵa bas bostandyǵynan aıyrdy, dep habarlaıdy  QazAqparat tilshisi.

Osy isti qaraǵan sýdıa Dáýren Madalıevtiń aıtýynsha, aýyr qylmys ótken jyldyń 31-shi jeltoqsan kúni Túrkistan qalasynda bolǵan. Aıyptalýshy men onyń áıeli alty jyldaı otandasqan, zańdy nekede turǵan. Osy ýaqyt aralyǵynda olar eki balaly bolady. Qazir balalarynyń úlkeni 10, kishisi 6 jasta.

— Erli-zaıyptylar birge turǵan jyldary kóp urysyp, kúıeýi áıelin uryp-soǵypty. Mundaı azapqa tózbegen áıeli 2016 jyly ajyrasqan. Balalaryn ózimen birge alyp ketedi. Al, qylmys bolǵan kúni jábirlenýshi kelinshek eki balasymen meshittiń janynda ketip bara jatady. Olardyń janyna kúıeýi kelip, áıelin úıine qaıtarmaqshy bolǵan. Biraq oǵan kelinshegi qarsylyq bildirip, barmaıtynyn aıtqan. Ekeýi taǵy da urysyp qalady. Ashýǵa býlyqqan kúıeýi jubaıynyń basyn taspen urady, áıel qolyndaǵy alty jasar ulymen birge jerge qulap túsken. Osy kezde úlken uly sol mańdaǵy dúkenge baryp, kómek shaqyrýǵa barmaq bolady. Jolda bara jatqanda anasynyń daýysy shyqpaı qalypty. Artyna qarasa ákesi anasyn baýyzdap tastaǵanyn kórgen,- deıdi sýdıa. 

Ókinishtisi sol, analary kózderinshe ólgen eki jetkinshek osy jaǵdaıdan keıin psıhologıalyq turǵyda aýyr jaraqat alǵan. Ekeýi de qazir psıhıkalyq zaqym kelýine baılanysty esepke turǵyzylǵan. Tıisti em qabyldaýda. Al, 30-dan endi ǵana asqan áıelin de, perzentterin de aıamaǵan turǵynǵa sot aýyr jaza taǵaıyndady. Ol sot otyrysy kezinde qylmysyn tolyq moıyndaıtynyn, jasaǵan isine ókinetinin aıtqanymen jazasy jeńildemedi.

Bar bolǵany kelinshegin sóz qaıtarǵany úshin baýyzdaǵan aıyptalýshyny sot Qylmystyq kodekstiń 99-baby 2-bóligi 5-tarmaǵymen kináli dep taýyp,  15 jylǵa bas bostandyǵynan aıyrdy. Ol jazasyn Qylmystyq atqarý júıesiniń barynsha joǵary qaýipsizdik mekemesinde óteýdi belgiledi.