Elimizde ótken jyldarmen salystyrǵanda ólim-jitim kórsetkishi 27 paıyzǵa tómendegen. Bul jóninde Ortalyq komýnıkasıalar qyzmetinde ótken «Jalpyǵa ortaq densaýlyq saqtaý qyzmetine» arnalǵan baspasóz maslıhatynda aıtyldy.
«Sońǵy 10 jylda ómir súrý uzaqtyǵynyń 6 jylǵa ulǵaıǵany baıqalady, 2016 jyldyń qorytyndysy boıynsha qazaqstandyqtardyń ómir súrý uzaqtyǵy 72,3 jasqa jetti, ólim 27 paıyzǵa tómendedi, ana ólimi 4 ese tómendedi, náreste ólimi 1,6 ese tómendedi, týberkýlezden ólim 5 ese tómendedi, QJA-dan bolatyn ólim 3 ese tómendedi, al qaterli isikterden bolatyn ólim 20%-ǵa tómendedi» - dep málimdedi DSM Medısınalyq kómekti uıymdastyrý departamentiniń dırektory Laýra Ahmetnıazova.
Densaýlyq saqtaý júıesiniń qyzmeti aýrýlardyń aldyn alýǵa, erte anyqtaýǵa jáne tıimdi emdeýge basymdyqty baǵyttalǵanyn, memleket qabyldaǵan keshendi sharalar qazaqstandyqtardyń ómir súrý uzaqtyǵyn ulǵaıtý jáne sapasyn jaqsartý boıynsha eleýli nátıjıeler bergenin atap ótti.
«Medısınalyq qyzmettiń qoljetimdiligin qamtamasyz etý maqsatynda jekemenshik klınıkalardy halyqqa qyzmet kórsetýge kóptep jumyldyrýdy qor qolǵa aldy jáne bıylǵy jyly 1390 kompanıanyń 602-i - jekemenshik klınıkalarymen kelisimshart bekitildi», - deıdi L. Ahmetnıazova.
Spıkerdiń sózine súıensek,bul halyqqa tegin qyzmet kórsetetin medısına uıymdarynyń 43 paıyzyn quraıdy. Bul kórsetkish 2017 jylmen salystyrǵanda 183-ke artqan.
2017 jyldyń qorytyndysyna sáıkes, 2016 jylmen salystyrǵanda byltyr ólim-jitim boıynsha negizgi kórsetkishter jaqsardy. Jalpy ólim-jitim 3,1%, nárestelerdiń ólimi 6,2% , analar ólimi 5,5%, qan aınalym júıesinen ólim-jitim 1,8%, qaterli isikterden 5,3 %, týberkýlezden 11,8 % tómendedi. 2017 jyly 11 mln astam skrınıngtik tekseris ótkizilgen. 806 myń adamda syrqat tabylyp, olardyń 46 paıyzy dıspanserli baqylaýǵa alyndy. Halyqaralyq sarapshylar keńesi boıynsha, skrınıngtiń 4 túri tıimsiz bolǵandyqtan toqtatylǵan. Alaıda, skrınıngten ótetin adamdardyń jasy ulǵaıtylyp, qaralýdyń jıiligi artty. Turǵyndardyń ımmýnoprofılaktıkamen qamtylýy 2017 jyly 97% qurady.
Adamı kapıtaldy damytý maqsatynda Qazaqstan óz azamattarynyń ómir súrý uzaqtyǵyn jaqsartý qajet.
