QR İshki ister mınıstrligi uıaly telefon urlyǵymen baılanysty qylmystardy ashýda kezdesetin kedergilerdi atady, dep habarlaıdy QazAqparat.

«Telefon urlyǵyn ashýdaǵy negizgi problema - ol azamattardyń polısıaǵa kesh júginýine baılanysty. Sonymen qatar azamattardyń ustalǵan uıaly telefondardy satyp alýy, olardyń mobıldik qurylǵy IMEI-kodyn bilmeýi, múlikke quqy bar qujattardyń bolmaýy sekildi jaǵdaılar qylmystyń ashylýyn keshiktiredi», - dep atalyp ótken İİM-niń «QazAqparattyń» resmı saýalyna bergen jaýabynda.

Budan buryn habarlanǵandaı, bıyl aqpan aıynda QR Aqparat jáne komýnıkasıalar mınıstri Dáýren Abaev Qazaqstanda uıaly telefon urlyǵyn azaıtýdyń sharalary týraly aıtty.

«Tájirıbe kórsetip otyrǵandaı, uıaly telefondy IMEI-kod arqyly tabý múmkin bolmaı otyr. Budan bólek, naryqta IMEI-kody birdeı uıaly telefondar da kezdesedi. Bul máseleni qurylǵynyń IMEI-kodyn ıesiniń JSN-y men abonent nómirine baılanystyrý arqyly ǵana sheshýge bolady. Telefon osylaı tirkelgen kezde, uıaly telefondy urlaý múldem tıimsiz bolady», - dedi Dáýren Abaev.