Islam dini baǵytyndaǵy DDA 570 ustanýshysymen áńgimelesý júrgizildi.
Mundaı tyń aqparatty Almaty qalasynyń Óńirlik komýnıkasıalar qyzmetinde ótken brıfıń barysynda Din isteri jónindegi basqarmasynyń basshysy Aıdar Esenbekov málimdedi.
Aıdar Rahymjanulynyń baıandaýynsha, DDA ustanýshylardyń shoǵyrlanatyn negizgi oryndary shaǵyn jáne orta bıznes nysandary (bazarlar, saýda úıleri, uıaly telefondardy jóndeý oryndary jáne t.b.) bolyp tabylady.
DDA ustanýshylarymen barlyq ońaltý jumystary ákimdiktiń quqyq qorǵaý organdary jáne arnaıy organdar qyzmetkerlerimen, QMDB ózara tyǵyz baılanysta júzege asyrylady.
2016 jyly áleýmettik mańyzdy jobalardy oryndaý boıynsha memlekettik áleýmettik tapsyrys aıasynda Keńes berý, aldyn alý jáne ońaltý ortalyǵy quryldy.
Jalpy 2017 jyl basynan bastap ıslam dini baǵytyndaǵy DDA 570 ustanýshysymen áńgimelesý júrgizildi. Negizgi jumys olardy teologıalyq bas tartqyzý jáne dástúrli Islam arnasyna bet burǵyzý (Hanafı mazhaby).
Ortalyqtyń, «Nur-Múbarak» Egıpet ıslam mádenıeti ýnıversıteti qyzmetkerleriniń jáne qala meshitteri ımamdarynyń ótkizgen ońaltý jumystary nátıjesinde DDA 245 ustanýshysy ońaltyldy.
Osy rette, «Destrýktıvti jáne ekstremıstik dinı aǵymdardyń radıkaldy jáne jalǵan ıdeologıalarynyń yqpalyna ushyraǵan adamdar úshin keńes berý, aldyn alý jáne ońaltý qyzmetterin kórsetý boıynsha ońaltý ortalyǵynyń qyzmetin uıymdastyrý jáne jalǵastyrý» jobasy aıasynda jumys josparyna sáıkes aǵymdaǵy jyly radıkaldy dinı ıdeologıaǵa beıim destrýktıvti dinı aǵymdardyń keminde 1000 jaqtastary jáne ustanýshylarymen jeke áńgimelesý ótkizý josparlanǵan.
2017 jyly qalanyń dindar bóligi úshin kelesi sport túrleri boıynsha (mınıfýtbol, gir kóterý, sadaq atý, qazaq-kúresi, asyq atý, láńgi-tebý, arqan tartý, baǵanaǵa órmeleý jáne t.b.) uıymdastyrylǵan sporttyq joba halyqtyń dindar bóliginde erekshe qyzyǵýshylyq týdyrdy.
Joba aıasyndaǵy mınıfýtbol boıynsha («Almaty qalasy meshitteriniń jamaǵaty arasyndaǵy fýtbol lıgasy») saıystarǵa qalanyń 48 meshitiniń jamaǵatynan quralǵan 403 komanda qatysty, al, qatysýshylardyń jalpy sany 2500-nan astam adamdy, onyń ishinde 360-tan astam DDA ustanýshysyn qurady.
Jalpy alǵanda, joba aıasyndaǵy sporttyq-buqaralyq is-sharalarǵa Almaty qalasynyń 13 500-ge jýyq dindar jamaǵaty qatysty.
Budan ózge, dindar áıelderdiń radıkaldanýyn tejeý jáne shoǵyrlanýyna jol bermeý maqsatynda jalpy sany 1500-ǵa jýyq áıel qamtylǵan 200-den astam aldyn alý sıpatyndaǵy is-shara ótkizildi.
Júıeli túrde dinı ekstremızm men terorızm ıdeologıasynyń nasıhattalýyn boldyrmaý maqsatynda qylmystyq túzetý júıesi mekemelerinde jazasyn ótep júrgender, onyń ishinde destrýktıvti dinı ıdeologıany ustanýshylar arasynda aqparattyq-túsindirý jáne ońaltý jumystary júıeli túrde júrgizilip otyrady. Mysalyǵa 2017 jyly mamandar 49 kezdesý jáne leksıa ótkizip, 1113 adam qamtyldy.
Din salasyndaǵy negizgi boljamdyq qujattar, naqtyraq aıtqanda «Qazaqstan Respýblıkasynyń din salasyndaǵy memlekettik saıasatynyń 2017-2020 jyldarǵa arnalǵan tujyrymdamasy» jáne «2018-2022 jyldarǵa arnalǵan dinı ekstremızm jáne terorızmge qarsy is-qımyl jónindegi memlekettik baǵdarlama» esebinen din salasyndaǵy turaqty ahýaldyń saqtalýy jáne DDA ustanýshylarynyń belsendi qyzmetiniń báseńdeýi kútilýde. Kórsetilgen mindetti oryndaý úshin budan ári barlyq memlekettik organdardyń ózara tıimdi árekettestigi kútilýde, - dep sózin túıindedi Aıdar Esenbekov.
