Almatyda memlekettik organdar men megapolıs bıznes qaýymdastyǵynyń qatysýymen jyl saıynǵy kásipkerler konferensıasy ótti. Taraptar Almatynyń bıznes ahýalyn jaqsartý máselelerin talqylady.

Jıyndy ashyp bergen «Atameken» UKP prezıdıým tóraǵasy Tımýr Qulybaev UKP qurylǵan 2013 jyldan beri kásip­kerlerdiń múliktik quqyǵy 92 mlrd. teńge­den astam qarjyǵa qorǵalǵanyn aıtty.

– Almaty – qazaqstandyq bıznestiń besigi. Munda eldiń kásipkerlik qaýymdas­tyǵynyń eń kóp bóligi shoǵyrlanǵan. Búgingi tańda megapolıste kásipkerler úshin kedergisiz jumys isteıtin bıznes-ahýal jasalǵan. Bıyl biz Almatyda tolyq formatty kásipkerlerge qyzmet kórsetý ortalyǵyn ashýdy josparlap otyrmyz. Ortalyq «bir tereze» qaǵıdasymen jumys isteıtin bolady», – dedi «Atameken» basshysy T.Qulybaev.

Óz kezeginde sóz alǵan Almaty qalasy­nyń ákimi B.Baıbek konferensıanyń memleket pen bıznes arasyndaǵy tıimdi dıalog alańyna aınalǵanyn atap ótti.

– Memleket basshysynyń tapsyrma­symen Almatyda bıznes-ahýaldy jaqsartý men jeke bastamalarǵa jaǵdaı jasaý erekshe jolǵa qoıylǵan. Búgingi tańda megapolıs jeke bıznes pen shıkizattyq emes ekonomıka qalasy bolyp qalyptasty. Qalada 170 myńnan astam SHOB sýbektisi bar, bıznes 10 almatylyqtyń jeteýin qamtyp otyr. Megapolıste UKP-men birlesip bızneske jaǵdaı jasaý jolǵa qoıylǵan, – dedi shahar basshysy Baýyrjan Baıbek.

Almatyda tartymdy ınvestısıalyq ahýal qalyptastyrý úshin qurylysqa ruqsat berý, komýnaldyq júıege qosylý­lar elektrondy formatqa kóshirilgen. Al almaty.genplan.kz ınteraktıvtik kartasy ashyq ta qoljetimdi. Injenerlik jeliler, elektr qýaty men sýdyń erkin qýaty, «qyzyl syzyqtar», t.b. aqparattar ornalasqan bul saıtqa erkin kirýge bolady. Jáne de bıznes ókilderine qalanyń damýynyń bas jospary, josparlaý júıesi, jer-kadastrlyq kartalar, t.b. qoljetimdi.

Ótken jyly elektrondyq júıedegi memlekettik qyzmet sany 8 ese ósti. Bıyl ákimdiktiń «paper-free» qaǵıdasyndaǵy 10 suranysqa ıe qyzmet túri elektrondy formatqa kóshedi.

Budan ózge, turǵyn úı komýnaldyq sharýashylyq (TKSH) salasynda jańa jo­ba­lardy júzege asyrý josparlanǵan. Olar – «aqyl­dy jaryqtandyrý», Big data qalyp­tastyrý jobalary. Open Almaty alańynda «bir te­reze» formatynda tehnıkalyq qyzmet kór­setý josparlanǵan. Almatynyń damý orta­lyǵy negizinde sıfrly ofıs jasaq­tady.

Búginde megapolıs DKB-2020 baǵdar­lamasy bastalǵaly maquldanǵan joba­lardy júzege asyrý boıynsha birinshi orynǵa shyqty. Jumyssyzdardy, ózin-ózi qamtýshylardy jylyna 6 paıyzben shaǵyn nesıe berý arqyly kásipkerlikke tartý boıynsha baǵdarlama da júzege asýda. Baǵdarlamanyń basynan 1,4 mlrd. teńgeniń 90 jobasy iske asqan.

Almaty aqshamy