Almaty qalasyndaǵy Dostyq úıinde Qazaqstan halqy Assambleıasynyń respýblıkalyq biryńǵaı kúni aıasynda «Qazaq tilindegi 100 jańa oqýlyq» jobasyn talqylaýǵa arnalǵan jıyn ótti. QHA tóraǵasynyń orynbasary Ábilfas Hamedov tóraǵalyq etken jıynǵa Abylaı han atyndaǵy Halyqaralyq qatynastar jáne álem tilderi ýnıversıtetiniń ǵylymı jumys jónindegi prorektory Saǵadı Bólekbaev, ál-Farabı atyndaǵy QazUÝ-dyń fılosofıa kafedrasynyń meńgerýshisi Gúljıhan Nurysheva, Qazaqstan kúrdteriniń «Barbang» qaýymdastyǵynyń tóraǵasy Knáz Mırzoev qatysty.
Sonymen qatar, QHA «Jańǵyrý joly» respýblıkalyq jastar qozǵalysynyń Almaty qalalyq shtabynyń ókilderi, qalalyq etnomádenı birlestikterdiń jastar qanatynyń tóraǵalary, stýdenttik uıymdardyń kóshbasshylary bar. Basqosýǵa qatysýshylar «Rýhanı jańǵyrý» baǵdarlamasy aıasynda «Jańa gýmanıtarlyq bilim. Qazaq tilindegi 100 jańa oqýlyq» jobasynyń mańyzyna toqtalyp, álemdik ádebıettiń jaýhary sanalatyn 18 oqýlyqtyń tuńǵysh ret qazaq tiline aýdarylýy baǵa jetpes qazyna ekendigin tilge tıek etti.
– Biz Derek Djonstonnyń «Fılosofıanyń qysqasha tarıhy. Sokrattan Derrıdaǵa deıin» degen oqýlyǵyn aǵylshyn tilinen qazaq tiline aýdardyq. Ekinshi avtor fılosofıa ǵylymynyń kandıdaty Gaýhar Zulpyharqyzy. Biz jumysty byltyrǵy maýsym aıynda bastadyq. Jumys ońaı bolmady. Jaýapkershiligi mol. Óıtkeni, bul Prezıdenttiń tapsyrmasy. Onyń ústine, aýdarylǵan kitaptyń sapasyna qaraı otandyq fılosoftarǵa baǵa beriledi. Biz kitaptyń sońǵy nusqasyn 4-5 ret óńdedik. Árbir sózdi, árbir sóılemdi tekserdik. Negizgi maqsat – bul qazaqtyń jastaryna arnalǵan oqý quralyn jazyp shyǵý, – dedi fılosofıa ǵylymynyń doktory Gúljıhan Nurysheva.
Al Qazaqstan kúrdteriniń «Barbang» qaýymdastyǵynyń tóraǵasy Knáz Mırzoevtyń aıtýynsha, joǵary oqý oryndaryndaǵy stýdentterdiń 70 paıyzy qazaq tilinde oqıtynyn eskersek, álemniń gýmanıtarlyq saladaǵy injý-marjandarynyń qazaq tilinde sóıleýi rýhanı jańǵyrýymyzǵa yqpal etpek.
«Qazaq tilindegi 100 jańa oqýlyq» jobasy boıynsha jaqynda 18 oqýlyq jaryqqa shyǵady. Olar ekonomıka, fılosofıa, tarıh, til bilimi, jalpy áleýmettik-gýmanıtarlyq salalardy qamtıdy. Bir ereksheligili, bul kitaptardyń barlyǵy da aǵylshyn tilinen qazaq tiline aýdarylǵan.
18 oqýlyqtyń árqaısysy 10 myń danamen basylady. Aldaǵy bir aıda elimizdiń barlyq óńirlerine taratylyp, kitaphana sórelerinen tabylatyn bolady.
Almaty aqshamy
