Almatyda bıyl jazda 12 shaqyrymnan astam jylý júıeleri qaıta jasalady. Qazirgi kezde daıyndyq jumystary júrýde, al 10 mamyrdan qalanyń jeti kóshesinde kólik qozǵalysyn segmenttik shekteý bastalady. Aldaǵy ýaqytta ınjenerlik jelilerdi jóndeý jumystaryna oraı ótken keńeıtilgen jıynda Almaty ákimi Baýyrjan Baıbek jaısyzdyqty barynsha azaıtý úshin ýaqytsha syzbalar arqyly qala turǵyndaryn jyly sýmen turaqty qamtamasyz etýdi tapsyrdy.
Bıylǵy jyly jylý júıelerin modernızasıalaý jumystary Bógenbaı batyr, (Muqanov/Áıtıev), Jambyl (Pýshkın/Nazarbaev), Qazybek bı (Ýálıhanov/Abdýllınder), Qarasaı batyr (Naýryzbaı batyr/Chaıkovskıı), Tóle bı (Varlamov/Ótegen batyr/Otar), Chaıkovskıı (Qarasaı batyr/Tóle bı) jáne Shagabýtdınov (Qurmanǵazy/Ortalyq stadıon) kóshelerinde júredi.
Almaty ákiminiń orynbasary Almas Mádıev óziniń sózinde qazirgi kezde ár ýchastok boıynsha naqtyly keste jasalǵanyn, tehnıka men jumysshylarynyń sanynyń anyqtalǵandyǵyn aıtty. Qaıta jasalatyn barlyq obektilerde merdigerlik uıym týraly aqparat bar pasport, tıisti jol beligleri bolady jáne júrginshiler úshin qorshaýlar qoıylady.
Ol kóptegen nysandarda rekonstrýksıalaýdy shilde aıynyń sońynda aıaqtaýdyń josparlanǵanyn, al keıbir kúrdeli jáne uzyn ýchaskelerde jumystyń tamyz aıynda bitetinin aıtty. Jumys barysynda jaqyn ornalasqan aımaq mindetti túrde abattandyrylady.
Energetıka jáne komýnaldy sharýashylyq basqarmasy buryn jóndelgen ýchaskelerdiń jol jıekterindegi topyraqtyń shógýin zertteýdi bastady, olar kepildi mindetteme retinde merdiger arqyly qalpyna keltiriledi.
Aıta keterligi, Almatyda 2018 jyly 157 kósheni jóndeý josparlanǵan.Almaty rekonstrýksıasy aıasynda qalanyń birqatar mańyzdy dańǵyldary jańarady, sonyń ishinde Abaı, Ablaı han, Nazarbaev dańyǵldary jáne basqalary bar. Buryn jóndelgen 455 aýla alańdaryna qosa bıyl qalanyń barlyq aýdandarynda taǵy 585 aýla jańarady.
