Ońtústik Qazaqstan oblysynyń ónerpazdary osy jyldyń sáýir men naýryz aılarynda Eýropa men Azıanyń 9 memleketinde 22 konsert qoıdy. Bul týraly óńirlik komýnıkasıalar qyzmetinde ótken baspasóz konferensıasynda oblystyq mádenıet jáne tilderdi damytý basqarmasynyń mádenıet jáne óner bóliminiń basshysy Ǵalıa Sharafıeva málim etti.
«Elbasynyń «Bolashaqqa baǵdar: rýhanı jańǵyrý» maqalasy aıasynda TÚRKSOI uıymynyń uıymdastyrýymen Naýryz merekesine arnalǵan konserttik baǵdarlamamen shetelde óńirdegi Sh.Qaldaıaqov atyndaǵy oblystyq fılarmonıanyń ártisteri men halyqaralyq bı baıqaýlarda júldeli oryndarǵa ıe bolyp júrgen «Qazyna» bı ansambli jáne túrkistandyq «Semser» toby óner kórsetti. Olar Eýropadaǵy Bosnıa jáne Gersegovınanyń Zenısa, Saraevo, Mostar qalalarynda, Chernogorıanyń Setıne, Albanıanyń Tırana, Makedonıanyń Gostıvar, Bolgarıanyń Plovdıv jáne Sofıa qalalarynda boldy. Al oblystyq opera jáne balet teatrynyń solıseri men mádenıet jáne halyq shyǵarmashylyǵynyń ártisteri Fınlándıa, Shvesıa, Estonıa elderinde óner kórsetti»,-dedi Ǵ.Sharafıeva.
Sonymen qatar, baspasóz konferensıasynda sóz alǵan halyqaralyq TÚRKSOI uıymynyń rejıseri Arman Nurmahamatuly Túrkıa elinde naýryz aıynda ótken «Kastamoný - Túrki áleminiń mádenı astanasy» jylynyń ashylý saltanatyna oblys ákiminiń qoldaýymen baryp qaıtqanyn atap ótti.
«Ár elden kelgen ónerpaz óz dástúrin, tili men dilin óner arqyly nasıhattap, týystyǵy berik Túrki eline shýaǵyn shashty. Onda Ońtústik ónerpazdary «Saryarqa» ánimen Kastamoný kógin ánmen terbetip, «Babalar rýhy» ánimen el namysyn tý ete asqaqtatqan «Semser» tobynyń jigitteri el yqylasyna bólendi. Órnekti bıimen halyqaralyq júldelerdi qanjyǵasyna baılap júrgen «Qazyna» bı ansambliniń árbir qımyly patrıottyq rýhpen úndesip, tatýlyq pen bereke-birlikti pash etti. Budan bólek, atalǵan óner maıtalmandary Túrkıanyń Kastamoný, Ankara, Ystambul qalalarynyń turǵyndaryna konserttik baǵdarlama usyndy»,-dedi Arman Nurmahamatuly.
Budan bólek, spıkerler Elbasynyń «Bolashaqqa baǵdar: rýhanı jańǵyrý» maqalasy men Astananyń 20 jyldyǵyna oraı óńirde oblystyq «Burań bel» bı festıvali jáne «Qazyna» bı ansambliniń 30 jyldyǵyna arnalǵan «Dala rýhy» mereıtoılyq konserti ótetinin aıtty.
