25 sáýirde Almaty qalasy mamandandyrylǵan aýdanaralyq ekonomıkalyq sotynyń «Delta Bank» AQ jumysyn májbúrli túrde toqtatý týraly sot sheshimi kúshine endi. Bul týraly Qamshy.kz aqparat agenttigi Qazaqstannyń depozıtterge kepildik berý qorynyń baspasóz qyzmetine silteme jasap habarlaıdy.
Osylaısha banktiń klıentteri men úleskerleri — jeke tulǵalar aǵymdaǵy shoty men tólem kartalaryndaǵy somany qaıtarýǵa quqyly. Naqtyraq aıtqanda, olar 10 mıllıon teńgege deıin qarjyny ulttyq valútada, 5 mıllıon teńgege deıingi somany shetel valútasynda qaıtaryp ala alady.
Tólemdi qaıtarý «Bank SentrKredıt» AQ arqyly Qazaqstannyń depozıtterge kepildik berý qorynyń qarajaty esebinen óteletin bolady. Bank-agent kepildendirgen tólemdi óteýdi 2018 jyldyń 17 mamyrynan bastaıdy.
Kepildendirgen tólemdi óteý boıynsha QDKBQ mindettemesiniń somasy 141 mıllıon teńgege teń; klıentterdiń sany - tólemge quqyly jeke tulǵalardyń sany — 2 244 adam.
Kepildendirilgen tólemdi qaıtarýǵa arnalǵan QDKBQ-nyń jalpy mólsheri 577,6 mıllıard teńgeni quraıdy.
Sonymen birge kepildendirilgen somadan kóp aqsha salǵan jeke jáne zańdy tulǵalar bank aktıvterin ótkizý barysynda tártip boıynsha kezekpen Qazaqstan Respýblıkasynyń bank jáne bank jumysy týraly zańnamasyna sáıkes, «Delta Bank» AQ-tyń lıkvıdasıalyq komısıasynan óz bereshegin alýǵa quqyly.
Eske sala ketsek, «Delta Bank» AQ bankke qatysty jáne ózge de operasıalar boıynsha QR Ulttyq bank basqarmasynyń qaýlysymen 2017 jyldyń 3 qarashasynda lısenzıadan aıyrylǵan bolatyn. Ulttyq bank Tóraǵasynyń buıryǵymen «Delta Bank» basqarý organynyń barlyq quzireti ýaqytsha ákimshilikke berilgen edi. Ýaqytsha ákimshiliktiń quramyna Ulttyq bank pen «Qazaqstannyń depozıtterge kepildik berý qorynyń» qyzmetkerleri engen. «Delta Bank» AQ-nyń jumysyn májbúrli túrde toqtatý týraly sheshimdi Almaty qalasy mamandandyrylǵan aýdanaralyq ekonomıkalyq soty 2018 jyldyń 13 aqpanynda shyǵarǵan bolatyn.
Qazaqstannyń depozıtterge kepildik berý qory — 1999 jyly ekinshi deńgeıli bankterdiń zańdy múddesi men quqyǵyn qorǵaý úshin qurylǵan Ulttyq banktiń uıymy bolyp tabylady.
