Qazaqstanda ónertapqysh álem boıynsha Wi-Fi taratatyn sımka oılap tapty. Bul týraly QR ınvestısıalar jáne damý vıse-mınıstri Tımýr Toqtabaev QR Parlamenti Májilisinde «Qazaqstan Respýblıkasynyń keıbir zańnamalyq aktilerine venchýrlyq qarjylandyrý máseleleri boıynsha ózgerister men tolyqtyrýlar engizý týraly» zań jobasynyń tanystyrylymy barysynda habarlady.
«Keıde úlken bolmasa da, jobalar adamdy qyzyqtyrady. Máselen, siz shetelge shyqqanda roýmıng boıynsha kóp shyǵynǵa batatynyńyz anyq. Al qazaqstandyq ónertapqysh sizderge qolaıly sımka oılap tapty. Ol búkil álem boıynsha Wi-Fi taratady. Qaı elge barsańyz da, sol sımka arqyly WhatsApp-ty da, Viber-di de qosa alamyz. Jáne tegin qońyraý shala alasyz. Ony ózim de paıdalanýǵa asyqpyn. Eń bastysy sımkany qazaqstandyq oılap tapty. Eger ony tıisinshe qarjylandyrmasaq, otandyq ónim sheteldiktiń qolyna ótip ketedi», - dedi vıse-mınıstr.
Tımýr Toqtabaev ózge de perspektıvaly jobalardy atady. Óz baıandamasynda mundaı jobalardy der kezinde qarjylandyryp turý mańyzdy ekenin eskerdi.
