Facebook áleýmettik jelisinde salafıtke turmysqa shyǵyp jábir kórgen áıeldiń vıdeoúndeýi jarıalandy, dep jazady Qamshy.kz aqparat agenttigi.   

Shymkent qalasynyń turǵyny jaqyndary men jeke bas qaýipsizdigi úshin aty-jónin jasyryp qaldy.  Áıeldiń aıtýynsha ol salafıtke turmysqa shyǵyp, kóp uzamaı basqa salafıt jigitterge syı retinde berilgen.

"Namaz oqyp, salafıtke turmysqa shyqqannan keıin sizdiń árbir aıtqan ýaǵyz, leksıalaryńyzdy tyńdap kelemin. Sizdiń shákirtim dep júrgen salafıt baýyryńyzǵa turmysqa shyqtym. Kóp uzamaı ózimniń baýyrym dep júrgen ekinshi salafıtke meni syı, zat retinde syılady. Ekinshisi úshinshisine, úshinshisi tórtinshisine syılap kete berdi. Ár turmysta balaly bolyp otyrdym. Bir salafıtke barasyń: «Buǵan kim kináli?» dep suraq qoısań, «Taǵdyr ǵoı, qaryndasym. Sabyr saqta!» deısizder. Qaıdaǵy taǵdyr, buǵan taǵdyr emes, qatelikterińiz, nadan tirlikterińiz kináli. Qansha qyz, kelinshekter sizdiń aıtqan ýaǵyzdaryńyzdy, leksıalaryńyzdy tyńdap, shákirtterimiz degen adamdarǵa turmysqa shyǵyp, qansha bala jetim boldy, qansha áıel jesir bolyp kóshede tentirep júr?!" deıdi áıel.

Áıel ımamnyń kómegine júgingisi keletinin aıtqanda burynǵy kúıeýleri olardan alys júrýdi buıyrǵanyn aıtady. 

"Imamdardy tyńdamańadar. Olar bıǵdatshylar, adasýshylar" deısizder. Olar emes, sizder adasýshylarsyzdar. Shetelge qashyp, el arasyna iritki salyp, qazaq kelinshekterin jaqsy joldan taıdyryp, shúberek sekildi paıdalanyp otyrǵan sizder", - dep ishki zarymen bólisken áıel qyzdarǵa aqylyn da aıtty.

"Qyzdar, áli de kesh emes. Es jınaýǵa ýaqyt bar. Men salafıtpin dep júrgenderge turmysqa shyqpańdar. Olardyń arbaýyna túsip qalmańdar. Bastapqyda olar jánnattyq ómir syılaıtyndaı kórinedi, biraq arbaýyna túsip qalǵannan keıin degenderin isteıdi" dep qyzdarǵa keńesin aıtty.

Ózi jábir kórgen adamnyń esimin atady.

"Jánnattyń kilti ananyń tabanynyń astynda. Meniń árbir kóz jasym, balalardyń kóz jasy, qanshama áıeldiń kóz jasyna qalǵan Dilmurat, erteń árbir kóz jasymnyń aqysyn sizden alamyn. Árbir qyzdyń kóz jasyna, haqysyna, sen jaýaptsyń. Bala-shaǵamnyń kórgen qıynshylyǵynyń, aqysyn sennen alamyn. Shynaıy bilimdi adam qazaq halqyna, Qazaqstan eline qyzmet etip, shynaıy jany ashıdy. Dilmurat, basqa ilimdiler sen sekildi elinen qashyp, iritki salmaıdy. Osy jaǵyn tereń oılansańyzdar deımin" dep sózin túıindedi áıel.